watoto wasianguke tena kwenye shimo za maji taka

nadhani umeshawahi kusoma mahali au kusikia ama hata kushuhudia watoto wadogo kutumbukia kwenye shimo za maji taka. suluhisho ni dogo tu; otesha boda ndefu kuzunguka shimo!

zaidi ya kuficha shimo la maji taka pia mimea hii naongeza unadhifu wa muonekano wa bustani. wakati naziotesha sikufikiria kama zitafunga hivi.

rangi ya ukuta inaoana na ya landscape.

my article for newspaper: tai za pazia

Ongeza unadhifu  wa chumba kwa kutumia tai za pazia   

                                                                                

Tai za pazia ni kwa ajili ya matumizi na mapambo. Kutokana na mitindo lukuki iliyopo ya tai hizi, unaweza kupata seti ya tai ambayo itaendana na mapambo yako mengine ya ndani. Nia kuu ni kushikilia pazia mbali na dirisha hivyo kudhibiti kiasi cha mwanga unaotaka kuruhusu uingie ndani kwa kuwa na uwezo wa kufungua pazia zikashikiliwa kwa tai na wakati huo huo ukaongeza umaridadi wa muonekano.

Tai za pazia ni njia rahisi ya kufanya pazia za kitambaa kuonekana nadhifu na maridadi, au kwa kudumu ama wakati wa mchana. Baadhi ya watu wanapendelea kuacha pazia wazi wakati wa mchana na kuzifunga usiku. Hii inasaidia kuongeza mwanga wa asili chumbani na kuleta hisia za usalama zaidi usiku. Kwa kufungua pazia zionekane maridadi, tai za pazia ni suluhisho. Kwa kawaida tai hizi zinashikiliwa na vishikizo ama kulabu zinazochimbiwa ukutani karibia na dirisha. Vishikizo  hivi vyaweza kuwa vya mbao au chuma na vinawekwa kutegemea na staili na uzito wa pazia zikihudumia kuendana na mapambo ya chumba.

Tai za pazia zinatengenezwa kwa unene tofauti kutokana na uzito na staili ya pazia. Tai nzito zinafaa kwa kushikilia pazia nzito lakini pia zinatumika kwa pazia nyepesi. Tai za pazia zenye kifundo ni maarufu na za kimapambo zaidi na zinatumika kwa pazia za vitambaa vinene na vizito. Kwa sababu tai hizi huwa ni kubwa na nzito hivyo zinaendana moja kwa moja na aina hii ya pazia. Vifundo kwenye tai hizi huwa vinakuwa ni vya kusukwa kwa nyuzi na wakati mwingine huwa vifundo hivi vimeongezewa shanga. Kwa hivyo kwa umaridadi unaweza kuchagua rangi mojawapo kwenye tai itakayooana na pazia na mandhari nyingine za chumba.

Tai za pazia zisizokuwa na maridadi  zimetengenezwa kwa kitambaa chepesi na zinatumika kufungia pazia nyepesi. Rangi zake zinaweza kuendana na zile za pazia. Tai za pazia sio lazima ziwe ni kitu cha kipekee, zinaweza hata kutengenezwa kutokana na kitambaa hichohicho cha pazia. Hii ni njia rahisi ya kutumia kitambaa sahihi cha pazia na tai zake kuendana na mandhari ya chumba.

Tai za pazia zinatofautiana sana kwa umbo na ukubwa. Fikiria ni tai gani zinakazokidhi mahitaji yako na muonekano wa chumba unaotaka kutengeneza. Kwa hivyo wakati wa kunua tai za pazia hakikisha unajua kuwa unataka za ukubwa gani na ziendane kwa uzito na pazia utakazotumia; hii itamalizia muonekano wa chumba. Uwe na uhakika pia wa idadi ya tai unazohitaji, je utataka ziwe kwa seti au moja moja. Ni mara ngapi tai husika zitatumika. Kwa mfano zitakuwa zimeshikilia pazia muda wote kama mapambo au ni wakati wa mchana tu. Kama ni za kufungua na kufunga mara kwa mara basi tumia zile tai ambazo hazina madoido mengi.

Kulabu za kushikilia tai za pazia zinawekwa kwa urefu ambao hautakuwa shida kufungua pazia. Hakuna urefu maalum wa wapi pa kufunga tai za pazia.  Pia fimbo pazia zilikotundikwa zinahusika kwani nyingine ni ngumu kuvuta pazia wakati wa kufungua, kwa hivyo ziwe fimbo ambazo hazina usumbufu ukitaka kufungua na kufunga pazia. Weka fimbo ambazo pazia litateleza kilaini wakati wa kufunga na kufungua.

Kwa kweli pazia zitakuwa hazijakamilika bila tai maridadi za pazia. Kitupio hiki kidogo tu kinabadilisha muonekano mzima na mandhari ya chumba chako.
Iwe nia ni kufungua pazia ili kuruhusu mwanga kiasi kuingia ndani au kuzipa pazia umbo la umaridadi zaidi basi tai za pazia ni muhimu kutimiza malengo haya mawili. Ni muhimu kuisikiliza sauti yako mwenyewe na kutengeneza makazi ambayo yanafaa staili ya maisha unayoishi wewe na ya familia yako. Mitindo inakuja na kuondoka lakini kama utajenga kujiamini na kuwa staili ambayo ni ya kipekee nyumbani kwako hutaangukia kwenye utumwa wa kurukia kila pambo la ndani utakaloona. Kulinganisha na kushindanisha kila pambo madukani kutanyonya nguvu yako ya ndani badala ya kuielekeza kwenye mambo mengine, ukiwa mkweli wa nafsi yako mwisho utapata ladha yako ya kudumu.

Makala hii imeandaliwa na Vivi O. Machange. Vivi anajishughulisha na usafi wa mazulia na nguo; pia ana mapenzi makubwa ya mitindo na mapambo ya nyumbani. Kwa maoni au maswali tuma kwenda 0755 200023

mmea ambao kwa uchache kila nyumba upo

kibongo bongo huu mmea unaitwa boda

boda zinapendezesha kwa kuonyesha mipaka

boda ni ngangari kwa jua kali, hazihitaji maji kivile

boda zinasaidia kupunguza kasi ya maji ya mvua yanapogonga chini yasidunde juu kuchafua ukuta

ukishaotesha boda kazi yako iliyobaki ni kuzikatia tu

chandelier

nimependa taa hii ya dining room niliyokutana nayo yenye umbo la pweza 

rafiki zangu wa kweli wanamalizia likizo

My article for newsapaper: kabati dogo la nguo

Jinsi ya kufaidika na kabati dogo la nguo

Sio wengi wenye uwezo wa kuwa na chumba maalum kwa ajili ya kujiandaa kwa kuvaa na kuwekea nguo na viatu. Badala yake wengi wanakuwa na kabati la nguo kwenye chumba cha kulala kwa hivyo ni lazima watumie nafasi waliyonayo ingawa yaweza kuwa ni ndogo sana. Makala hii itakupa jinsi ya kuweza kuongeza nafasi kwenye kabati lako la nguo na kuondoa mrundikano unaoweza kuwepo kwenye eneo hili muhimu ambalo pengine kukiwa na ajali ya moto ndani ya nyumba ni sehemu ungeweza kujitosa hata kama ni kuungua ili kuokoa viwalo vyako.

Kama ilivyo kwa vifaa vingine vya ndani, makabati ya nguo siku hizi yanakuja na maeneo mengi ya kusaidia kuhifadhi kwa mfano kulabu za kutundikia, shelfu na kadhalika. Iwe ni sehemu ya kuhifadhi nguo au hata zaidi ya hilo, karibia na kabati lako la nguo panatakiwa kuwa na sehemu ya kuvalia ukiwa umesimama na ukiwa umekaa, lazima pawe burudani kwa matumizi. Hapa ni maswali kadhaa yakujiuliza yatakayokusaidia kuboresha kabati dogo la nguo bila kujali ni vifaa gani unahifadhi humo:

•Je unataka sehemu ya kukaa?
Kiti ni kizuri kwa kukaa wakati wa kuvaa soksi na viatu. Unaweza kuweka kiti chini ya dirisha lililo karibu na kabati lako la nguo kwa kuwa huwezi kuitumia nafasi hii kwa kitu kingine chochote.

•Je wakati wa kuvaa unajiona vizuri kwenye kioo?
Jaribu kwenda angalau futi tatu mbali na kioo uone kama unajiona vizuri, na hakikisha kuwa kioo kiko sehemu isiyokuwa na kizuizi, kama vile nyuma ya mlango.

•Je una mpango kunyooshea hapo hapo nguo zako zilipo?

•Je unataka kuangalia TV wakati unapovaa?
Kama ndio, weka luninga karibia na kabati lako la nguo. Kama luninga haitakaa usawa wa macho basi inageuka radio.

•Je unapenda kuangalia nje wakati wa kuvaa?

Kumbuka kuwa kama unaweza kuona nje, wa nje nao wanaweza kukuona! Uamuzi ni wako.

Ikiwa umeshajiuliza maswali hayo yote na kuwa na majibu yake zifuatazo ni suluhisho rahisi za kuweza kuongeza nafasi kwenye kabati dogo la nguo la chumba cha kulala.

Hatua ya kwanza ni kufungua milango ya kabati na kutazama ndani. Usiwe na hofu hamna anayekuona ni wewe tu na kabati lako. Linakuambia nini?

• Rangi na mwanga. Kwenye kabati lako la nguo hakikisha kuna mwanga wa kutosha kwa ajili ya kuona vizuri kila kitu. Mwanga hafifu utakudanganya baadhi ya rangi. Kabati lako liwe kubwa au dogo kama halijatazamwa kwa miaka, hakikisha unalihuisha kwa kupaka rangi. Rangi nyeupe ni mahususi kwa kuwa inaongeza mwanga.
• Ondoa mrundikano. Kwa vile tayari umeshakosa nafasi na unahitaji kuongeza, kuondoa mrundikano ni fursa sahihi kwako ya kuamua ni nini cha kuondoa na kuwa na nafasi ya ziada kwenye kabati lako kabla ya kuweka mpangilio. Ni lini mara ya mwisho uliondoa usivyohitaji tena kwenye kabati lako la nguo? Unajua wakati unapofungua kabati lako angalia kifaa na kufikiria: “Mara ya mwisho kuvaa hii sketi ilikuwa….ilikuwa lini?...Aaah, ndio kwenye harusi ya fulani!” Lakini kama harusi ya huyo fulani ilikuwa miaka 15 iliyopita, ni nini hii sketi inachofanya kwenye kabati lako la nguo??? Tafuta muda wa kuondoa mrundikano na uache vile tu unavyovaa na kupenda.
• Weka mpangilio. Kuwa na mfumo unaoeleweka wa nini kinakaa wapi na jinsi ya kuhifadhi nguo za msimu. Hifadhi nguo za msimu kwenye masanduku na uyaweke juu ya kabati la nguo au kama una kitanda chenye hifadhi mvunguni hifadhi nguo za msimu humo. Chagua heng’a zenye kuweza kutundika vitu vingi kwa wakati mmoja. Weka vitu unavyotumia mara kwa mara usawa wa macho kiasi kwamba ukinyanyua mkono tu unachukua. Vile usivyotumia kila wakati weka mbali na macho.
• Tumia mlango wa kabati kwa kutundika vitu kama mfuko wa vitupio ama mfuko wa viatu. Kama hujatumia mlango kwa mfuko wa viatu unaweza kutumia sakafu ya kabati kwa kuweka shelfu za viatu.Tumia maeneo kadhaa ya kabati kwa matumizi mbalimbali kwa mfano madroo kwa kuweka nguo za kukunja na tumia ile sehemu ya wazi kutundikia hasa magauni na suti. Pembeni wa kabati la nguo weka kasha la nguo chafu kurahisiha kuhifadhi nguo za kufua.
• Remba. Ndio, weka urembo. Hii ina maanisha jipende na hivyo kuweka mazingira ya urembo kwenye kabati lako la nguo. Tundika hapo picha ndogo ya kumbukumbu nzuri kwako. Kila ukiwa unavaa unaiona na hivyo kukupa faraja. Uzuri ni silaha kubwa ya nguvu ya kutibu.

Makala hii imeandaliwa na Vivi O. Machange. Vivi anajishughulisha na usafi wa mazulia na nguo; pia ana mapenzi makubwa ya mitindo na mapambo ya nyumbani. Kwa maoni au maswali tuma kwenda 0755 200023

My article for newspaper: vizulia vya bafuni

Pendezesha bufuni kwako kwa kuweka vizulia

Ni wachache wetu wanatumia muda wao wa thamani kuweka mazingira yenye kuleta mvuto na burudiko bafuni. Unaweza kuweka vizulia vya bafuni  kwa matumizi na pia kama mapambo kuongeza ufahari wa muonekano wa bafu zako. Bafu nyingi zina sakafu za marumaru ambayo inaonekana maridadi sana lakini inaweza kuwa baridi kwa vidole vya miguu mitupu. Vizulia vya bafuni zaidi ya kuwa mapambo ni burudani kwa miguu yako.

Vizulia vya bafuni vinaweza kusaidia sakafu ya bafu kuwa na hisia ya joto na mvuto kwa watu waliopo ndani ya nyumba. Vizulia vingi vya bafuni  havitelezi  na vinatumiwa sana bafuni kuruhusu watoto na wazee kujikinga na sakafu ya baridi.

Vizulia vya bafuni ni njia rahisi kuliko zote za kuleta muonekano maridadi bafuni. Wala hutakiwi kupaka rangi upya au kuweka marumaru mpya ili kuleta muonekano mpya bafuni. Wewe weka tu vizulia sahihi na vitupio kadhaa na kila mtu atadhani kuwa umejenga upya bafu zako.

Unaweza kupata vizulia lukuki ambavyo vitakufaa kwa matumizi ya bafuni. Ila kwa kawaida huwa vizulia vya bafuni vinakuja kwa seti yake lakini hii haikuzuii kuwa mbunifu kwa kuweka vizulia bafuni kwa ladha yako.  

 Huna haja ya kung’ang’ania vizulia vya umbo la yai na duara ambavyo vimezoeleka na wengi kuwa ndivyo vya bafuni.

Wakati wa kuchagua vizulia vya bafuni ni muhimu kuzingatia kuwa bafuni ni muhimu kama vilivyo vyumba vingine vilivyo ndani ya nyumba yako. Kwa hiyo chukua muda kufikia maamuzi juu ya ni muonekano gani unataka kuujenga bafuni. Kwahivyo moja kwa moja utachagua vizulia sahihi kwa kuhuisha mapambo yako ya bafuni.

Seti za vizulia vya bafuni ni gharama nafuu kwa mtu wa maisha ya kati na kuna aina mbalimbali kwa mhusika kuchagua. Kama wakati wa kuchagua sakafu ya kuweka kwenye nyumba unavyohitaji iwe imara, vilevile kabla ya kununua vizulia vya bafuni hakikisha kuwa vinadumu,  vinaweza kustahimili mazingira ya bafuni, ni rafiki kwa watoto, vinaonekanaje na unavihisije ukiwa na umevikanyaga kwa miguu mitupu.

Sakafu ya bafuni huwa inapata matone ya maji ambapo inaweza kusababisha utelezi. Vizulia vya bafuni vinakupa kituo cha kusimama kwa kujiamini kuwa hutaanguka pale unapotoka kwenye sinki au bomba la mvua la kuongea.

Vizulia vya bafuni vinatakiwa viwe vinavyosafishika kirahisi . Havitakiwi kuwa na unyevu nyevu unaotokana na maji ya moto ya bafuni. Vile vizulia vyenye mpira kwa chini ni sahihi kuzuia uozo na kuvujisha maji. Hata hivyo jua kuwa vizulia vitatakiwa kuanikwa mara kwa mara kufanya tatizo la unyevu na uozo lisiwepo.

Vizulia vya bafuni mara nyingi vinawekwa yale maeneo yanayoweza kuloa maji kirahisi. Maeneo hayo hasa ni kama pale kwenye eneo la kuogea  na la kunawia mikono. Pia vinaweza kuwekwa kama tandiko la mlango wa bafuni. Ukubwa wa bafu ndio utaamua kama uweke kizulia kikubwa au vingi vidogodogo.

Ingawa kulikuwa na hasara kadhaa za kuweka vizulia bafuni, watengeneza mazulia wamechukua hatua madhubuti dhidi ya malalamiko makuu kuhusu zulia za bafuni – unyevu, ukungu na madoa. Ni rahisi kubadilisha zulia kuliko kubadilisha sakafu iliyooza.

Baadhi ya njia za kawaida ambazo vizulia vinaweza kukutana na unyevu bafuni ni pamoja na bakteria wanaojazana kwenye lile eneo la kuzunguka sinki la choo. Bakteria wanaokuwa kwenye mkojo kwa bahati mbaya wanaweza kusambaa kwenye zulia. Safisha vizulia mara kwa mara kuondoa ukungu na bakteria wanaoweza kuwepo. Hakikisha mara zote vizulia ni vikavu iwezekanavyo. Pia kuna vifaa mbalimbali vinavyoweza kusaidia kuzuia maji yasipite kwenye pazia la bafuni na kurukia kwenye kizulia.

Ingawa kizulia chochote kinaweza kutandikwa kwenye sakafu ya  bafuni, ambavyo vinatumika sana ni vile vizulia vya bafuni vyenye mpira kwa chini. Faida ya zulia za bafuni ni kuwa zinafanya bafu lionekane maridadi na lenye mvuto. Ni vilaini kuliko marumaru kwa hivyo watu wengi wanaburudika kuvikanyaga na miguu mitupu.  Ajali za kuteleza bafuni zinapungua.  Ni rahisi kuteleza kwenye sakafu ngumu ya bafauni kama vile marumaru kuliko kwenye zulia.

Kumbuka mapambo mengine hapo bafuni. Fikiria mwanga wa taa na rangi ya sakafu na vifaa vingine vya usafi vilivyopo hapo bafuni. Vizulia vya rangi za kung’aa  vinafaa kwenye bafu za watoto na vinaleta mvuto sana sakafuni.  Kwahivyo kama unataka macho yaelekee kwenye vitu vingine kama kioo cha ukutani weka vizulia vya bafuni visivyokuwa na rangi kali. Staili na mandhari mbalimbali zinaweza kupatikana mitandaoni au kwenye majarida ya mapambo ya ndani.

Kwa hivyo kama unataka kuweka muonekano mpya wa bafu lako vizulia ni chaguo sahihi na gharama nafuu zaidi. Vizulia sahihi vya bafuni vitafanya bafuni kuwe sehemu ya burudani kwa watoto. Ulishapata ugeni wa watoto nyumbani na wakawa hawaishi kuomba kwenye bafuni? Ni kwa kuwa kunavutia! Hebu fikiria umeweka vizulia vyenye katuni za spiderman, pazia la bafuni na miswaki inayooana, hutakaa ugombane tena na watoto wako wadogo kuhusu kupiga mswaki na kuoga. Vizulia visiwekwe kwenye bafu za jumuiya!

Makala hii imeandaliwa na Vivi O. Machange. Vivi anajishughulisha na usafi wa mazulia na nguo aina zote; pia ana mapenzi makubwa ya mitindo na mapambo ya nyumbani. Kwa maoni au maswali tuma kwenda viviobed@yahoo.co.uk au 0755 200023