FAIDA NA MITINDO YA LANGO KUU (GATE) LA KUINGILIA NYUMBANI

Nyumbani kwako ni eneo lako la kuwepo ambapo unakutana tena na ndugu na wapendwa wako baada ya siku ndefu na yenye uchovu mwingi. Je, ili uweze kujisikia amani ukiwa nyumbani, si vyema kuwa na uhakika wa ulinzi na usalama kwenye lango kuu ili kuwalinda mlioko ndani kutoka kwa walioko nje na wavamizi? Ni ukweli kuwa kila mmoja anahitaji faragha kwa hivyo nawe unayesoma makala hii ni vivyohivyo. Kuwa na lango kuu lenye vigezo vya msingi itakusaidia kupunguza muingiliano na ugeni usio wa lazima kwenye makazi yako.

Katika nyumba nyingi za kisasa, utaona lango kuu limekuwa ni kivutio,

na kwa lengo la makala hii ambayo inazungumzia lango kuu na sio ule mlango mdogo pembeni wa mtembea kwa miguu, nimefanya mahojiano na bwana Mmasi ambaye ni mtaalamu wa kutengeneza na kufunga malango katika makazi ya watu. Na hapa Mmasi anaanza na kueleza faida za kuwa na lango kuu.

Kuna faida kuu tano za kuwa na lango kuu la kuingilia nyumbani, anasema Mmasi. Nazo ni ulinzi, kuboresha muonekano wa nyumba, kuongeza thamani ya nyumba, usalama wa watoto wako na wanyama walioko kwenye makazi yako faida ya tano ni kuwa na faragha.

Wezi ni wahalifu  wanaoangalia fursa ya kuiba, kwa mfano kama nyumba yako ina lango kuu la kuingilia na ya jirani haina, unadhani ni nyumba ipi mwizi ataivizia zaidi? Kama umejibu “sio yangu”, basi kuna uhakika mkubwa uko sahihi. Kuwa na gate kunaongeza ulinzi wa nyumba.

Endapo gate lako litakuwa limebuniwa kwa sanaa yenye mvuto litakapofungwa hakuna shaka kuwa litaleta mvuto wa makazi yako na hivyo kuongeza thamani ya mali (nyumba), anasema Mmasi. Huu ni ukweli mtupu.

Lango kuu linasaidia kuwaweka wanyama wako ndani, tuseme una mbwa mkali ambaye anaweza kutoka na kudhuru watu pale unapokuwa umemfungulia kwa ulinzi.

Na kuhusu faragha unajua ni kwa kiasi gani mpita njia navyoweza kupita popote nje ya nyumba isiyokuwa na lango kuu, hasa kwa wale wanaoishi mijini. Nyumba zisizokuwa na gate watu wanapitapita tu popote.

Sasa tukiwa tumeshaziona faida kuu tano za kuwa na lango kuu la kuingilia nyumbani hebu tuangalie miundo ya malango haya kwenye nyumba nyingi za kisasa. Kwa Watanzania wenye nyumba za kisasa kuna miundo mikuu miwili ya malango ya kuingilia kwenye nyumba zao. Nayo ni  yake ya kufungua kama milango mingine ya nyumba, yani kwa mfano kama unavyofungua mlango wa chumba chako cha kulala na muundo wa pili ni yale ya kuteleza kwenye reli.

Mwanzoni wengi walikuwa na haya malango ya kufungua kama milango mingine ya nyumba, kadri ubunifu unavyoongezeka wapo wanaoanza kuweka haya ya kuteleza.

Tukianza na haya malango ya kufungu kama mlango wa chumbani ni kuwa nayo yapo ya aina mbili. Lile lango lililo moja tu na unafungua upande mmoja na aina ya pili ni lile lango lililo na pande mbili la kufungua huku na huko. Sasa kuamua ni mtindo upi kati ya hii miwili inazingatiwa na upana wa njia panapofungwa lango. Kama njia ina upana wa mita mbili (wapo wanaofanya nhadi mita mbili na nusu) basi unaweza kuweka lango la upande mmoja. Na kama upana wa njia ni zaidi ya huo inashauriwa kuweka lango la pande mbili la kufungua huku na huko. Pia nisisitize kuwa malango ya aina hii yanapaswa kufunguka kwa ndani. Endapo utaamua kufungua lango lako kwa nje basi uhakikishe una nafasi ya kutosha na hauko karibu na barabara kwamba wakati wa kufungua haitaleta usumbufu kwa wengine.  Na bila kusahau ni kuwa malango haya yanatakiwa kufungwa eneo ardhi ni tambarare.

Sasa tukiingia kwenye hii aina ya pili ambayo naweza kusema ni ya kisasa zaidi ni hii ya lango kuu la kuteleza. Kama jina lake linavyosema kuteleza, ni kwamba lango hili lina gurudumu ndogo ambazo zinateleza kwenye reli.

Ili kuweza kusimika lango la kuteleza unapaswa uwe na eneo la kutosha kwenye upande ambao lango litafungukia. Eneo hili liwe pana sawa na upana wa lango lenyewe. Na malango ya aina hii hayana upande maalumu wa kufungukia, laweza kufunguka au kushoto ama kulia kuendana na eneo ulilonalo la ziada liko upande upi. Kama huna eneo hili kwenye upande mmojawapo wa lango basi fahamu kuwa huwezi kusimika lango la kufunguka kwa kuteleza kwenye reli.

Lango kuu la kuteleza linatakiwa liwe yamefungwa mota kwa kuwezesha kufungua na kufunga. Ila kuna wenye nyumba wengi tu ambao pamoja na kuwa wana malango ya mtindo huu lakini wanayafungua na kufunga kwa kusukuma kwenye reli kwakuwa bado hawajaweka mota.

Mmasi anamalizia na kukuambia wewe msomaji wangu kuwa umeshajua faida na mitindo ya malango ya kuingilia nyumbani. Ni kazi kawako sasa kuamua ni mtindo upi utakaokufaa.

Makala hii imeandaliwa na Vivi, kwa maoni au maswali tembelea www.vivimachange.blogspot.com