Muonekano wa Kabati la Vyombo

Kama una chumba rasmi cha kulia chakula na kina nafasi ya kutosha, uwezekano ni kuwa tayari una kabati la vyombo kama sehemu ya muonekano mzima wa chumba hicho, kwani kwa asili kabati la vyombo linawekwa kwenye chumba cha kula chakula. Ingawaje kabati hili linakusaidia kuhifadhi vyombo vyako vya thamani kwa pia ni pambo kwenye chumba cha chakula.

Makala hii itakujuza muonekano wa kabati la vyombo na hivyo kukusaidia kuboresha ulilonalo na kukuhamasisha kuwa nalo kama bado huna.

Kwa ajili kabati la vyombo ni zito na ni fenicha kubwa, watu wengi hawapendi kulisogeza mara kwa mara, hata kama wana uwezo wa kufanya hivyo. Pia kwa nyongeza mara nyingi ni kuwa kabati la vyombo linafiti eneo moja tu la chumba cha chakula. Familia ambazo zina watoto wadogo nyumbani zinatakiwa kuwa makini kwani watoto wanaweza kupamba juu au kuliangusha na likasababisha ajali kama ambavyo tulishawahi kusikia wakati fulani kwenye maisha yetu ajali ya mtoto kuangukiwa na kabati la vyombo.

Makabati ya vyombo yako ya mitindo miwili; yale ya milango mpaka chini na yale ya milango nusu na eneo la chini droo. Kwa hiyo ni uamuzi wako kuamua ni la mtindo upi unataka. Pia kama una chumba cha chakula kikubwa, kabati kubwa la vyombo ni bora zaidi ili kuleta uwiano wa chumba. Na kama una eneo dogo la chumba cha chakula kabati dogo la vyombo ndio linafaa zaidi. Na kiukweli wengi wenye vyumba vidogo vya chakula wanapenda kubuni kabati la vyombo ambalo linafiti kwenye kona ya chumba, ili kutumia nafasi ambayo vinginevyo ingekaa bure, anasema mbunifu wa ndani dada Agripina.

Ni vizuri rangi ya kabati la vyombo ifanane na ya fenicha nyingine za chumba cha kulia chakula. Wengi wanapenda kabati la vyombo libaki na ile rangi asili ya mbao badala ya kuongezea rangi nyingine. Na endapo watapenda kuongeza rangi basi chaguo namba moja ni rangi nyeusi, anasema fundi seremala anayetengeneza makabati ya vyombo, ndugu Mmasi.

Kabati la vyombo lengo lake namba moja ni kuhifadhi vyombo vyako vya thamani kwa namna ambayo italeta mvuto, na ndio maana mbele huwa ni la kioo. Kanuni hapa ni kuleta uwiano wa kuhifadhi vyombo mbalimbali na kuvutia. Kuwezesha hili unatakiwa kugawanya vyombo vyako kwenye makundi kuendana na muonekano, na kuamua ni vipi uweke kwenye eneo la maonyesho ambalo ni eneo la vioo. Kwa mfano, kundi la sahani, kundi la vikombe, kundi la mabakuli, kundi la majagi, kundi la visosi, kundi la glasi, kundi la matrei na kundi la sahani mojamoja za kupambia.

Hala tafuta uwiano wa vyombo hivi kwenye kabati, kama umeweka sahani ya kupambia upande mmoja hakikisha kuwa unaweka na wa pili.

Ingawa kabati la vyombo ni kwa ajili ya vyombo bado linaweza kupambwa kwa kutumia hivyohivyo vyombo vyako hasa kwenye zile sehemu zinazoonekana, kwani kama tujuavyo makabati ya vyombo ya kuvutia yana milango ya vioo. Kwa hivyo kabati hili unawekea vyombo vyako na vilevile mapambo ya ladha yako.

Kupamba kabati la vyombo kwa njia ya kuvutia ni kuwa na vyombo vyote vinavyoonekana viwe kwenye rangi za kufanana. Kwa mfano kama kabati lako lina vyombo vya mapambo vya rangi za bluu na nyeupe, fikiria kuendelea kuongeza vyombo vya michoro yenye rangi hizohizo kama vile glass, vyungu au vesi, majagi, sahani na vikombe vya bluu. Ukichanganya vyombo vya rangi mbalimbali kabati halileti muonekano wa kuvutia, anasema Agripina.

Hakikisha kuna uwiano wa rangi kwenye kabati zima. Kama kabati lako ni kubwa na lina sehemu ya vioo ya kutosha unaweza kuamua kupambia kwa kuongeza vitu vya msimu uliopo. Njia moja ya kufanya hivi ni kutenga shelfu au juu ya kabati kuweka vitu hivi vya msimu na sehemu nyingine yote ya kabati iliyobakia kubaki katika mpangilio wa awali. Hivi vitu vya msimu vinaweza kuwa ni kwa mtindo wa mabakuli makubwa, matrei au vesi.

Kabati la vyombo si tu kwa ajili ya vyombo, unaweza kuweka humo vitu vyako vya kuvutia ambavyo ungependa kuvihifadhi lakini sio kwenye kificho. Vitu hivi ni kama vile vitambaa vya meza, album za picha vitu vilivyofumwa kwa jinsi ya kuvutia machoni na kadhalika.

Vtu vya silva kwa maana ya vijiko, visu, uma na vinginevyo viwekwe kwenye droo za kabati lako la vyombo.

Kabati la vyombo liliopangwa na kupambwa vizuri ni ongezeko muhimu katika chumba cha kulia chakula, fanya kabati hili liwe kitovu cha chumba hiki.

Makala hii imeandaliwa na Vivi, kwa maoni tembelea www.vivimachange.blogspot.com