Jinsi ya kupamba nyumba yako kwa kuhusisha milango yote mitano ya fahamu

Msomaji wangu kichwa cha makala hii  ni kama vile kinakurudisha darasani! Je, unaikumbuka milango mitano ya fahamu? Mara nyingi tunasahau, wakati wa kupamba nyumba zetu tunazingatia mlango mmoja tu wa fahamu ambao ni macho. Ni vyema kuhusisha

pia milango minne iliyobaki, ambayo ni ngozi inayokupa hisia au mguso, pua inayokupa harufu, masikio yanayokupa sauti na ulimi unaokuwezesha kutambua ladha.

Mfano mzuri wa eneo ambalo ninaweza kusema kuwa kuonekana kwake kunahusisha milango yote mitano ya fahamu ni ufukweni. Muonekano wa uzuri wa  bahari, sauti ya mawimbi yake, harufu, ladha ya maji ya chumvi, hisia za mchanga kwenye nyayo za miguu  na upepo unaokupiga usoni.

Ingawaje ufukwe unaonekana mzuri lakini kuleta manadhari yake ndani ya nyumba haifurahishi kwa ajili hupati kuhusisha ile milango mitano ya fahamu kama ufukwe halisi, utanisamehe kama mapambo yako ya ndani yana mandhari ya ufukweni.

Kwahivyo kwa wengi wetu wakati wa kupamba mlango pekee wa fahamu tunaouhusisha ni jicho, kwa maana ya kujali tu muonekano utakaopatikana.Kuhusisha milango minne ya fahamu iliyobaki ni njia ambayo itafanya sehemu unayopamba ipendeze na itumike zaidi kwa lengo lililokusudiwa.

Tukianza na mlango wa fahamu wa jicho; mpangilio, rangi na mwanga ni vitu vikuu vitatu ambavyo vinahusika hapa. Rangi inaweza kukuchangamsha au kukutuliza. Mwanga unaweza kuelekeza jicho lako mahali fulani na mpangilio uwe ni wa fenicha na mapambo madogodogo unaleta hisia za uwiano na utulivu.

Kwa upande wa pua ambayo inawezesha kunusa kwenye kupamba unaweza kuhusisha mapambo ambayo yatakupa harufu, iwe ni maua, mishumaa, viungo, mafuta, mimea inayotoa harufu au pafyum . Harufu ndani ya nyumba inasaidia kuleta hisia za mahaba.  Vilevile usisahau faida za kufungua dirisha, hewa safi toka nje inasaidia kuboresha ile ya ndani.

Njia kuu ya kuhusisha mlango wa fahamu wa ngozi ni kwa vitambaa na malighafi unazotumia kupambia. Iwe iwavyo chumba kilichopambwa pindi kinapotumika kinagusishwa na ngozi, yupo atakaye kalia kiti na yupo atakayependa kulala sakafuni na vilevile kugusana na vitu. Chagua vitambaa na blanketi ambazo unajisikia vizuri zinapokusa ngozi yako. Chagua sakafu ambayo utapenda kutembea ukiwa miguu mitupu. Kwa mfano kuna malighafi za sofa ambazo ukiiangalia hujisikii hata ukalie sofa lenyewe na zipo zingine unatamani kukaa kabla hata ya kukaribishwa ukae. Tuseme unaishi maeneo ya baridi au ndani kwako ni baridi labda kwa ajili unatumia kiyoyozi; halafu malighafi iliyotengenezea sofa nayo ni aina ya plastiki, bila shaka huwezi kuvutiwa kukalia sofa lenyewe. Unaweza kubadilisha malighafi kuendana na msimu, kwa mfano msimu wa baridi kali malighafi za pamba zinaleta hizia nzuri zaidi kuliko za plastiki. Kwahivyo hisia zinazopatikana wakati wa mguso wa ngozi na mapambo yako zitaonyesha ni kwa jinsi gani umeshirikisha vyema mlango huo wa fahamu. 

Kwa upande wa kushirikisha mlango wa fahamu wa sikio ambao unakupa sauti, fahamu kuwa sauti ndani ya nyumba ni jambo muhimu mno katika kuonyesha tabia ya nyumba husika. Sikiliza sauti zinazosikika ukiwa ndani mwako ili uweze kutengeneza mazingira ya utulivu. Je sauti ya hiyo mota ya jokofu au kicheko cha jirani au mlango wenye bawaba zinazopiga kelele zinakupa mazingira unayofurahia? Endapo unafurahia mziki mkubwa basi sambaza spika ndogo ndogo chumbani  ili sauti isambae vizuri kwani ikitoka kwenye chanzo kimoja inasababisha kelele. Fikiria namna ya kuondoa sauti zinazokukera.

Mlango wa mwisho wa kuuongelea katika upambaji wako ni ulimi, ambao unakupa ladha. Katika upambaji ladha inakuwa tofauti na ile ya chakula. Ladha hapa inamaanisha ni kwa namna gani upambaji wako unakurahisia maisha yako ya kila siku. Tunaangalia ni kwa namna gani chumba kilichopambwa kitatumika kuburudisha katika maisha ya kila siku. Je kuna kimeza pembeni cha kuwekea kikombe cha kahawa pale utakapokuwa umekaa kwenye sofa huku unataka kunywa kahawa yako? Inakuwaje kama ukimwagia kitu kwenye sofa? Ni ile ladha tunayotaka chumba kiwe nayo kuwezesha yoyote anayeishia hapo arahisishe maisha yake.

Kwahivyo kama ambavyo tumeona ni kwamba ukipamba kwa kuzingatia milango yote mitano ya fahamu eneo linapendeza na kutumika ipasavyo tofauti na pale unapotumia mlango mmoja tu. Unadhani ni mlango upi wa fahamu ambao umeutumia zaidi kwenye mapambo ya nyumba yako. Nijulishe kwenye maoni!

Makala hii imeandaliwa na Vivi, kwa maoni au maswali tembelea www.vivimachange.blogspot.com