NJIA ZA KUPAMBA SIKUKUU HII

Chochea furaha na msisimko wa kipindi cha sikukuu za mwisho wa mwaka kwa kupamba ndani na nje ya nyumba yako. Vitu rahisi hata  kama ni vijipambo vya meza tu huleta tofauti kubwa ya muonekano wa mazingira ya nyumbani.

Baadhi ya njia tofauti unazoweza

kuhuisha muonekano wa kizamani wa nyumba yako ni kama ifuatavyo:

Ongeza picha na michoro: Kuongeza picha nyumbani kwako kunaongeza muonekano mpya mara moja kutoka ule wa zamani. Ni njia rahisi kabisa kuhuisha sebule yako. Unaweza kuongeza picha za familia ama nunua picha za fremu kuleta muonekano wa kipekee.

Ongeza mimea na maua: Pamba mazingira ya ndani na nje ya nyumba kwa maua na mimea. Vyungu na vesi za maua nje na ndani ya nyumba vinaleta mvuto.

Badili pazia: Pazia za kila siku zinafanya nyumba isionekane tofauti. Hakuna kitu kinacholeta tofauti kubwa kwenye muonekano wa nyumba kama pazia.

Paka rangi:  Huisha kuta za mazingira ya nyumbani kwako japo kwa kuongeza mkono mmoja tu ya rangi.

Weka mito mipya: Badilisha mito ya sebuleni na uweke ya rangi mbalimbali hasa zile zinazoendana na sikukuu. Mito yenye rangi kali zilizokolea kwenye sofa zako au hata ile mikubwa ya kukalia sakafuni inabadilisha muonekano wa ndani ya nyumba bila ya kutumia gharama na nguvu kubwa.

Panga vitu upya: Kuhamisha fenicha toka eneo moja hadi lingine kunasaidia kubadili muonekano wa chumba.

Weka mapambo madogodogo:  Kipindi hiki cha sikukuu mapambo ni mengi madukani. Tumia nafasi za wazi kama vile juu ya kabati au shelfu na kadhalika kuweka mapambo katika kila chumba kuleta ladha ya sikukuu. Pia unaweza kuzungushia taa zisizo na gharama za kumeremeta za msimu huu wa sikukuu kwenye miti ya bustanini au eneo la lango kuu au hata eneo la ngazi ili kuleta mvuto.

Kama tujuavyo sikukuu za mwisho wa mwaka zinazokuja ni krismasi na mwaka mpya hivyo usisahau kupamba kwa mti wa krismasi! Mti huu umekuwa ni pambo la kipekee kwenye nyumba nyingi duniani na hata maeneo ya jumuiya na ofisi nyingi kila mwaka kwenye sikukuu ya krismasi.

Bila shaka utatumia njia kadhaa kati ya hizi kupamba nyumba yako sikukuu hii.

Makala hii imeandaliwa na Vivi Machange. Nitumie picha ya namna ulivyopamba sikukuu hii. Simu/whatsapp 0755 2000 23 www.vivimachange.blogspot.com