Namna ya kutumia marumaru za mosaic kupendezesha nyumba

Marumaru za aina ya mosaic ni marumaru ndogondogo ambazo mara nyingi ni za pembe nne na ukubwa wake huwa ni inchi 2 kushuka chini. Tuungane na

fundi James Urio ambaye anatujuza namna ya kutumia marumaru hizi ndani ya nyumba zetu.

Anaanza kwa kusema kuwa watu wengi wanaogopa au hawajui namna ya kutumia marumaru za mosaic kwenye nyumba zao na badala yake zinaonekana zaidi zikiwa zimewekwa kwenye majengo makubwa ya hadhara hasa bafuni na kwenye nguzo. Hii inasikitisha kwakuwa hizi marumaru zinaweza kutumika kuongeza rangi na mvuto kwenye chumba chochote ndani ya nyumba zetu. Zinapotumiwa kwa usahihi zinaweza kufanya sehemu iwe  kitovu cha chumba.

Jambo la msingi katika kutumia marumaru za mosaic ni kuchagua za rangi sahihi kwa eneo unalotaka kuziweka. Fikiria kwa makini ni nini lengo la chumba hicho na utagundua kuwa kupendezesha ndani ya nyumba yako kwa marumaru za mosaic ni rahisi sana. Cha muhimu ni kufurahia wigo mpana uliopo wa marumaru hizi na pia uwezekano wa kuziweka kwa kuchanganya rangi zaidi ya moja. Zina uwezo mkubwa wa kubadilisha sehemu kupata hisia unayotaka kwahivyo usizichukulie poa.

Bafuni ni sehemu namba moja ya  kuweza kupendezesha kwa marumaru za mosaic kwasababu ni nadra sana kukosea kwenye eneo hili la nyumba. Zinaongeza hisia za asili bafuni kama vile unaogea  nje kwenye maporomoko ya maji yaliyozungukwa na mawe. Chagua rangi za asili kisawasawa, na utakapoongezea pazia lenye michoro ya asili pia itasaidia mno kuleta hisia za asili utakayopata wakati ukioga kwenye bafu lako hilo. Rangi za kijani na udongo ni za hisia za asili, kwa maana hiyo mosaic za kijani kilichokolea zinafanya sehemu zilizowekwa ionekane zaidi ya nyingine.

Marumaru za mosaic kwa eneo la bafuni unaweza kuzitumia ukutani, pembeni ya sinki la kuogea na pia sakafuni. Pia kwa kuchanganya za rangi zaidi ya moja utatengeneza muonekano wa kuvutia na unapotumia za rangi ya bluu kwenye sakafu ya bafu hakika panapendeza.

Jikoni ni eneo lingine maarufu unaloweza kusisitiza uzuri wake kwa kutumia marumaru za mosaic. Unaweza ukaziweka kwenye eneo la kati ya kaunta na makabati ya juu, rangi za marumaru utakazochagua ndizo zitafanya jiko livutie.

Sakafu ya marumaru za mosaic inaweza kuwekwa katika chumba chochote mbali na bafuni, kwa mfano, mosaic za rangi mbili tofauti zitavutia kwenye korido.

Inawezekana baadhi ya wenye nyumba wasipende rangi za kuwaka na nzito, ila haimaanishi kwamba hawawezi kuweka marumaru za mosaic. Kitakachosaidia ni uchaguzi na uchanganyaji wa rangi, kama unataka rangi za kiume basi chagua nzito na nyeusi lakini hakikisha kuwa kuna mwanga wa kutosha.