My article for newspaper: Hatua za kupamba

Hatua za kupitia ili kufanikisha kupamba nyumba yako

Wazo la kuanza kupamba ndani ya nyumba ni la kusisimua au kuogopesha kutegemea na uzoefu, bajeti, ladha na pia muda wako.

Kabla ya kuanza kupamba chumba kwanza kihakiki. Na njia nzuri ya kuhakiki chumba ni kuondoa kila kitu. Ukishaondoa samani, pazia na sanaa za ukutani basi unaiona sehemu kwa uwazi zaidi. Chunguza paa, ukuta madirisha na eneo lenye mbao. Je kuna kitu kinahitaji marekebisho? Mara nyingi bafuni na jikoni ndio kunakuwa na hitaji la marekebisho makubwa. Vipengele hivi vitatu vya paa, ukuta na sakafu ni kitovu cha muonekano wa chumba.  Hakikisha unafanya marekebisho yote yanayohitajika kabla ya kuanza kupamba.

Kama hujawahi kupamba kabisa, unaweza kujihisi kuwa hujui ni vipi au ni wapi pa kuanzia. Kama kupamba ni kofia ya zamani kwako, unaweza usijue ni wapi pa kumalizia. Lakini baada ya yote kusemwa na kufanyika, unataka muonekano mpya na unataka kuanza kazi ya kutafuta muonekano huo.

Kuna swali dogo sana juu ya ni kitu gani ufanye mwisho, lakini kuna vitu lukuki vya kuanzia. Kwa kuwa kupaka rangi kama nyumba ilishapakwa rangi kabla basi inakuwa sio kazi kubwa na rangi zipo za aina nyingi, unatakiwa kusubiri kununua rangi hadi uwe na vitu vingine vyote.

Lakini ni nini ufanye kwanza? Je ununue fenicha za kujaza chumba au ununue hicho kizulia kinachokuvutia? Je umeshachagua kitambaa cha kifahari utakachokitumia? Ni kweli kuwa unaweza kuanzia popote unapotaka na kuunganisha yote pamoja kwenye mpango mmoja.  Ila kiukweli inasaidia kama unaanza kwa mpango, vitu kinachokuhamasisha na mandhari ya rangi.

Tafuta vyanzo vya hamasa yako na anza kuufanyia kazi mradi wako huo wa kupamba. Utafurahi kuwa ulichukua muda kupanga.

Weka mpango wako kwenye karatasi. Ni kama tu mchanganuo wa biashara ni lazima uweke maono yako kwenye maandishi. Weka kwenye maandishi na tekeleza. Pambanua staili yako halafu chagua mpango wa rangi kwa mandhari yako. Je unachagua mapambo ya kizamani, ya kitamaduni au mapambo ya kisasa.  Chukua muda kupambanua vipengele vya staili inavyopenda na fanya mpango wa kuvileta nyumbani kwako.

Anza na ulichonacho. Sio kila mtu (kwa kweli ni watu wachache sana) wanaoweza kuanzia ziro, chumba kitupu na kuanza kupamba. Wengi wetu tayari tuna fenicha kadhaa au nyumba ina sakafu ya marumaru au vitu fulani fulani kwenye ujezi ambavyo usingependa kuvitupilia mbali kwenye upambaji wako. Kama kuna vitu unavipenda vizingatie na kuvifanya maalum. Kama kuna vitu usivyopenda lakini huwezi kuvibadili, tafuta njia za kuvififisha kwenye eneo lako jipya ulilopamba.

Kama una vitu vya kupambia, hivi vinaweza kuwa kianzio cha mpango wako wa kupamba. Kwa kuzingatia mpangilio wa rangi na mandhari ya kupambia unaweza kupambanua mwanzo wa mradi wako huo wa kupamba.

Labda ulichonacho cha kuanzia ni sanaa za ukutani, mara nyingi sanaa unayochagua itasema ni nini unapenda. Kwa mfano kama unapenda picha za rangi nyeusi na nyeupe huenda ikakubidi upambe ndani mwako kwa mtindo wa kisasa zaidi.

Kuna rangi unayopendelea zaidi? Kama una rangi unayopendelea itumie ikuongoze kwa mpangilio wa rangi za mapambo yako ya ndani. Itumie kwenye vitupio vyako. Chagua vitambaa vyenye rangi na michoro hiyo unayopendelea. Tumia rangi zilizopo kwenye vitambaa hivyo kupambanua rangi utakazotumia kwenye ukuta, kwenye fenicha na kwenye vitupio vingine  utakavyochagua kama vile taa za vivuli na kadhalika.

Au anza na kizulia. Kwa  rangi na michoro ya kitupio cha kizulia unaweza kuweka vipengele vingine rahisi kwa kuzingatia kizulia badala ya vitambaa au rangi za kuta

Kufumba na kufumbua unaanza kuona ndoto yako ikikamilika, nyumba iliyovishwa rangi na sanaa zilizopangwa zikapangika.

Makala hii imeandaliwa na Vivi O. Machange. Kwa maoni niandikie barua pepe viviobed@yahoo.co.uk au kwa simu 0755 2000 23

My article for newspaper: Vizulia na mito

Mito na vizulia kama vitupio vya sebule ya kisasa

Pamba na pendezesha sebule yako kwa kuwa ni chumba unachoweza kupumzika zaidi ukiwa nyumbani kwako.  Hii inaweza kubadilisha mahali hapo kutoka kuwa sehemu ya kawaida ya kirafiki ya kupiga umbea hadi kwenye sehemu ya kisasa zaidi yenye muonekano wa kianasa na kutoa tamko la ladha yako. Makala hii itakujuza baadhi ya mapambo na vitupio vya kisasa vya sebule unavyoweza kupambia sebule yako:

Mito ni kitupio muhimu kwa mapambo ya sebuleni  na inaweza kuchangamsha rangi kwa sofa zenye rangi za kupooza.  Pia inaongeza faraja na huwa sofa nyingi zinakuja na mto mmoja au miwili lakini unaweza kuongezea ikawa mingi kwa kadri unavyotaka. Mito inapendezesha na unaweza kubadili ya rangi tofauti tofauti kubadili muonekano na anga ya sebule.  Unaweza kuwa na mito ya sofa kwa matukio maalum kama siku ya kuzaliwa na krismasi.

Zaidi ya kuwa mapambo mito ya sofa hutumika pia kwa ajili ya usingizi wa mchana wakati ambapo unahitaji mmoja kulala chini kwa dakika chache. Weka mto mgongoni uuegemee kama hupendi nafasi ya kiti ulichokalia. Mtoto mdogo anaweza kukalia mto wa sofa kumsaidia akae mezani. Ukiwa umemkasirikia mtu unaweza kumrushia mto wa sofa bila kusababisha uharibifu mkubwa.

Mito ya kwenye sofa inaweza kuwa laini au ya kutekenya. Unaweza kuipata kwenye vitambaa vya kung’aa au  vilivyofubaa. Mito ya pamba ni mizuri kuliko yote na unaweza kuiosha pale inapochafuka. Mito ya hariri inaweza kuwa mizuri na kuleta ufahari lakini mara nyingi ni ghali.

Vizulia vidogo vidogo vya kutupia maeneo kadhaa sebuleni vinaweza kutumika kufunika maeneo mabovu ya zulia kuu au sakafu na pia kuonyesha eneo maalum la kukaa ndani ya sebule. Vizulia hivi hupendeza sana hasa kama sebule ni kubwa na pia kuvitupia kwenye njia za kuingilia. Vizulia vya kutupia vina faida kubwa zaidi ya kufunika sakafu tu. Wakati wa kununua angalia mambo kama rangi, urahisi wa kuondoa madoa na saizi. Chagua saizi ambayo sio kubwa sana au ndogo sana kwa sebule husika. Vile vyembamba virefu ni kwa ajili ya maeneo ya ujia. Kama unanunua kizulia cha kutupia kwa ajili ya chumba kikubwa, ni wazo jema.

Vizulia hivi vipo vya pembe nne na vya duara. Kuchagua kizulia sahihi kwa eneo fulani inawezekana kuwa rahisi kabisa kwa kuzingatia maswali yafuatayo:

Kizulia husika kinatakiwa kiwe cha ukubwa gani? Ni staili ipi itafaa zaidi kutimiza malengo ya kuweka kizulia hicho hapo mahali, je ni staili ya pembe nne au duara?  Ni michoro na rangi zipi zitafaa zaidi? Ni kwa ajili gani unahitaji kizulia husika? Pima ukubwa wa mahali kabla hujafanya manunuzi.

Vizulia vya kutupia maeneo vinaweza kukugharimu hela nyingi kwa hiyo ni muhimu kuvitunza kuhakikisha maisha marefu.. Nyonya mchanga na vumbi mara kwa mara maeneo yanayokanyag wa mara kwa mara, na usisahau kunyonya mchanga na vumbi  mara chache maeneo  yanayokanyagwa mara chache. Safisha madoa mara yatokeapo badala ya kuyaacha kwa muda mrefu kwani yatakomaa. Kama una vizulia vikubwa na huenda ulinunua kwa gharama kubwa utahitajika kupeleka kwa wataalamu wa kufua mazulia mara kadha wa kadha. Kumbuka kugeuza chini ya kizulia kuona kama kuna mchwa au mende wanaoharibu.

Kupaka kuta za sebule yako rangi nyeupe kunakupa nafasi nzuri ya kuwa mbunifu wakati wa kununua fenicha na mapambo mengine. Weka  taa za aina mbalimbali sebuleni, za kusomea, za kutia msisitizo eneo la burudani,  za kila siku za kuwasha wakati wa familia kukutana  na taa za disko wakati wa pati.

Eneo la vyomba vya habari nayo inashika kasi kwa sebule za kisasa.Kwa hivyo mapambo na mtindo wa eneo hilo nao unapewa kipaumbele. Eneo hili ukuta wake huwa unapakwa rangi ya kukolea wakati maeneo mengine yanapakwa rangi hafifu. Eneo la vyombo vya habari huwa pia na shelfu za vitabu na DVD.

Samani na pazia pia vinaongeza rangi, staili na mapambo ya sebule. Kama utatumia vitupio vya sebuleni kwa njia sahihi, utafanya  muonekano wa sebule wa kuvutia. Lakini hakikisha kuwa huzidishi vitupio. Changamoto moja ya mito ya sofa  ni kuipanga kila baada ya unaponyanyuka kwenye kochi na kama utakuwa na mingi inaweka ikapoka chumba kwa hivyo kukifanya kionekane kurundikana. Faidi rangi ya vizulia vya kutupia kwa kuzioanisha vyema na mapamba yako mengine. Kama una sebule kubwa kumbuka kutupia tanki la samaki ili kuongeza uhai kwenye vitupio vyako.

Makala hii imeandaliwa na Vivi O. Machange. Kwa maoni niandikie viviobed@yahoo.co.uk au kwa simu 0755 200023

vijana mjini wanajipenda

Ian Dry Cleaners & Laundry tunafua zote zote ziwe ni za kutoka kwa Gucci au fundi Hamis..karibuni

Carpet zikiwa zinapigwa sop sop

Baada ya kufuliwa, kutolewa madoa, kuanikwa na kukauka sasa ni wakati wa kunyonya mchanga. Carpet hizi zina manyoya manene na marefu kwa hivyo uwezekano wa michanga kubakia kwa ndani hata baada ya kufuliwa ni mkubwa so ni lazima kuzi vacuum.

Carpet ziko tayari kwa ajili ya mteja kuchukua. Ni kama kanunua mpya vile. Kweli si kweli..

tuna jicho la usafi

Ukileta kapeti lako tukusafishie hapa Ian Car Wash hutajuta. Utalipokea tena kama jipya. Usisahau pia tunafanya laundry na dry cleaning. Karibuuuuu...

My article for newspaper: Jinsi ya kupata kitanda sahihi

Jinsi ya kununua  kitanda kitakachokufaa

Katika maisha haya ya kuchoka sana, kitanda cha kukupa starehe ndio kila mmoja wetu anahitaji. Baada ya kazi nyingi mno na uchovu, sote tunataka usiku wa mapumziko na starehe. Kitanda cha namna hii hakikupi tu hamasa ya kuanza siku ya kesho yake bali pia kinakupa nguvu ya kupambana na mabaya ya maisha. Inawezekana hukuwahi kufikiria hivi kabla, lakini ni lazima ukubali kuwa kitanda ni moja kati ya vitu muhimu zaidi kwenye maisha yetu. Hii ndio maana kabla ya kununua kitanda unatakiwa kuwa na uhakika wa unachohitaji kutokana na kitanda hicho.  Starehe, uimara na mtindo ni vitu vya kuzingatia katika kujipatia kitanda kitakachokufaa. Fuatana nami katika makala hii ujionee jinsi ya kujipatia kitanda sahihi kwako.

Inawezekana umeshaona aina kadhaa za vitanda kwa nyumbani kwa majirani zako au kwa rafiki, fikiria kwa undani kama kuna mtindo ambao umekugusa. Ni vyema kununua kile ambacho moyo wako umekuwa ukitamani.  Baadhi ya watu wanapendelea vitanda vya mbao na wengine wanakuwa na furaha wakiwa na vitanda vya chuma.

Mara zote cheki ni aina gani ya godoro litakalofaa kwa kitanda unachotaka kununua kwa kuwa mengine yanaendana na  muundo wa kitanda wakati yapo ya kufiti kwenye kitanda chochote. Pia hakikisha saizi ya godoro lako litatosha kwenye msingi wa kitanda husika.

Ni kawaida kwa mtu kuwa na ufahamu binafsi wakati anajaribu kitanda kwenye duka la muuzaji, na wanunuzi wengi huwa wanajaribu kitanda kwa kukilalia mara moja na kuamka. Lakini ili uwe na uhakika kuwa kitanda na godoro ni sahihi kwako, unatakiwa ulale kwa pozi mbalimbali kwenye kila kitanda kama unavyolala usiku  kwa muda wa  si chini ya dakika tano.

Kama umechagua kitanda  cha aina fulani, hakikisha unacheki kabisa hali yake ya starehe. Kama kitanda hakikupi starehe hutakaa ukitumie kwa furaha. Haina maana kununua kitanda hicho ambacho hakitakuwa na matumizi kwako hapo baadaye kwa sababu tu eti umependa mtindo na muundo wake. Tafuta kingine ambacho kitakupa starehe unayoitaka. Kwa mfano, ni kuwa unatakiwa kuchagua kitanda ambacho kina urefu wa inchi 4-6 zaidi ya urefu wa mtu mrefu zaidi atakayelalia kitanda hicho.

Uimara wa kitanda husika ni kigezo muhimu.Ni ukweli kuwa unawekeza hela nyingi kwenye kitanda, sasa ina maana gani kununua ambacho ni dhaifu na kitavunjika siku za karibuni. Kwahiyo ni vyema ukawekeza hela zako hizo kwa kitanda imara ambacho kitadumu miaka nenda rudi kwani kitanda sio kitu cha kununua kila mara.

Zaidi ya yote swali muhimu la kujiuliza ni kuwa ni kitanda cha ukubwa gani kitatosha chumba chako kwa nafasi iliyopo. Kama kitanda hiki ni kwa ajili yako na mwenzi wako ni vyema mkakubaliana wote wawili kabla ya kufanya maamuzi ya ununuzi. Ni lazima mfikirie pia kama kunaweza kuwa na kitanda kitakachofaa zaidi ya hicho mnachotaka kununua. Kama eneo ni dogo ni vyema mkafikiria kununua kitanda chenye sehemu ya kuhifadhia. Kitanda cha kuhifadhia hakina tofauti kubwa na hivi vya kawaida vilivyozoeleka na wengi bali tu ni kuwa kina sehemu ya kuhifadhia mithili ya droo chini ya godoro na vingine vina shelfu zilizojengewa kwenye ubao wa kichwani hivyo kuondoa haja ya kuweka vimeza vya kando.

Mwisho kabisa kama una matatizo ya mgongo aina ya kitanda unachohitaji nayo inahusu.  Kama kuna aina yeyote ya kitanda itakayokusaidia kwa hali yako hiyo basi nunua. Kama mtu ni mlemavu au mgonjwa  na anatafuta kitanda cha kumsaidia katika hali yake hiyo ni wazo zuri. Kitanda ni kati ya vitu vya manunuzi ya hela kubwa yanayofanywa kwa matumizi ya nyumbani. Sio tu kinawezesha kupata usingizi mnono bali kinahusika pia na afya ya mgongo wako. Maumivu ya mgongo yanaweza kufanya maisha ya watu  kuwa ya taabu, bali kuwa na kitanda sahihi kwa mgongo wako italeta tofauti kubwa.

Manunuzi ya kitanda imara ni ya pesa nyingi, kwa hivyo fikiria kwa kina juu ya nini unachotaka kabla ya kufanya uamuzi. Unapendelea mbao, chuma, ngozi ama kitambaa? Hakikisha unalinganisha na kushindanisha mauzo ya vitanda mbalimbali kabla ya kufanya  uamuzi wa mwisho.

Makala hii imeandaliwa na Vivi O. Machange. Kwa maoni niandikie barua pepe viviobed@yahoo.co.uk au kwa simu 0755 200023

Dry Cleaners Mpya Mjini...

Sisi hapa Ian Dry Cleaners unachagua unachopenda. Ukitaka kukunjiwa nguo haya ama ukitaka kutundikiwa twende.. Karibuni sana wapendwa..