stunning home

garden ambayo walau kila nyumba inahitaji...

My article for newspaper: Tablecloth

Vitu vya kuzingatia wakati wa kununua kitambaa cha meza

Kutandika kitambaa mezani kunatengeneza mandhari tulivu na kunaivalisha meza wakati wa chakula au tukio maalum. Kitambaa cha meza chaweza kuwa ni kwa ajili ya mapambo au kuilinda meza isidondokewe vyakula wakati wa kula. Kitambaa cha meza chaweza kuwa ni kwa matumizi ya meza ya ndani au nje. Sio gharama kubwa kununua au kushonesha kitambaa cha meza na huwa vitambaa hivi vinapatikana kwa rangi na michoro mingi.

Kitambaa cha meza chaweza kuwa cha nguo au jamii ya mpira.  Kwa kawaida vitambaa vya meza vya nguo ni rasmi kuliko vile vya mipira. Vitambaa vingi vya meza vya nguo vimetengenezwa kusafishika kirahisi, isipokuwa lesi, ambayo huenda ikahitajika kulowekwa na kufuliwa kwa mikono kwa uratatibu. Wakati wa kuchagua kitambaa cha meza cha nguo, chagua kile ambacho kinaendana na staili ya chumba chako cha chakula. Meza rasmi ya chakula inahitaji kitambaa rasmi cha meza.

Kwa umaridadi zaidi unaweza kutandika kitambaa cha lesi juu ya kitambaa cha meza cha nguo. Na pia unaweza kununua vitambaa vya meza viwili vya staili tofauti sahihi kwa muonekano rasmi au wa kawaida wakati wa kujumuika mezani kwa chakula.

Kama unachagua kitambaa cha meza kwa ajili ya meza ya nje, fikiria kununua cha mpira kwa ajili kitambaa cha nguo kinapauka kirahisi na jua na pia ni ngumu kukisafisha. Kitambaa cha meza cha mpira kinaweza kufutwa tu na kikatumika bila ya kukitoa mezani na kukifua. Vitambaa vya meza vya mipira huwa ni vya bei nafuu zaidi ila havidumu sana lakini vinastahimili zaidi mazingira ya nje.

Wakati wa kuchagua kitambaa cha meza inakupasa kutizama vitu kama rangi, ukubwa wa kitambaa, michoro na vifaa vilivyotengenezea kitambaa. Oanisha kitambaa unachotaka kununua na vitupio vingine hapo mezani kama vile mati, utambaa na napkini.

Matumizi ya kitambaa cha meza kwenye meza ya chumba cha chakula yanakuongezea nafasi ya ubunifu katika mapambo ya ndani mwako, hasa kama unataka kubadili muonekano lakini huna bajeti kubwa ya kupamba upya. Vitambaa vya meza vinakuja kwa kila rangi, na ni mahususi  kwa msimu wa sikukuu au mapangilio wa meza kwa mandhari fulani. Kuwa mbunifu kwa kuweka vyakula na mapambo yako ya meza kirahisi ili yasichoshe walaji walioko mezani.

Chagua kitambaa cha meza kilichotengenezwa kwa nyuzi za asili kwa kuwa huwa vitambaa vya aina hiyo vinakuwa laini na burudani zaidi kimuonekano. Kwa mfano vitambaa vilivyotengenezwa kwa pamba vinadumu kwa miaka mingi. Vitambaa vya meza vilivyotngenezwa kwa pamba na linen vimeonekana ni sahihi kwa matumizi ya mezani na vinadumu kwa muda mrefu.

Ukubwa wa kitambaa unahusu hasa pale unapotaka ni kwa kiasi gani kitambaa kining’inie kwa maana ya baada ya kitambaa kujaa mezani kile kinachodondokea chini kuelekea sakafuni. Kwa mpangilia wa kawaida wa meza kitambaa kinachoking’inia chaweza kuwa kifupi, kutegemea na maamuzi yako. Kama unapenda kuchagua mpangilio maridadi, kitambaa cha meza kinatakiwa kikaribie kabisa kugusa sakafu, na hii pia huleta muonekano rasmi zaidi. Kujua urefu wa kitambaa cha meza unahitajika kupima meza. Kwa meza zilizozoeleka za pembe nne, pima urefu wa meza ongezea na urefu wa mguu wa meza mara mbili ( Kumbuka kitambaa kinaanguka sawa panda zote za meza). Kama una meza ya yai ama duara, ni rahisi, nunua kitambaa cha yai ama duara na kumbuka kutumia mbinu ile ile ya kipimo ili kujua ukubwa wa kitambaa utakaoning’inia. Na pia kumbuka kuwa kuna vitambaa vingine ambavyo vimefungwa kwenye pakiti ambapo nje ya pakiti kuna vipimo vimeandikwa.

Kama una muonekano fulani kichwani na hujapata kitambaa sahihi, fikiria kushonesha kwa fundi. Vitambaa vya meza za pembe nne ni rahizi sana kushonesha na mara nyingi ndio meza ngumu kuweza kupata kitambaa cha ukubwa sahihi kilichotengenezwa tayari tayari. Kama utaamua kushonesha kitambaa kwa fundi hakikisha unakuwa na uhakika wa mambo kama kuchujiana rangi na pia kuna vitambaa vingine vinasinyaa na kupungua ukubwa vikifuliwa.

Kama wewe ni mtu unapenda sana mapambo fikiria pia marinda ya kona. Kitambaa cha meza kikifanya marinda maeneo ya kona kinaongeza umaridadi kwenye muonekano wa mapambo yako ya ndani.

Kwa kuwekeza kidogo, unaweza kununua au kushonesha vitambaa vya meza kwa ajili ya matukio yote na kuleta muonekano wa ukaribisho kwa meza iliyovalishwa maridadi. Unaweza kujikuta unafurahia muonekano huo na hivyo kufurahia msosi wako.

Usidanganyike kuwa kwa kusema tu ni meza ya yai ya watu 6 basi utapata kitambaa sahihi. Inaudhi umenunua kitambaa chako cha meza na mara unapokifikisha nyumbani hakitoshi mezani. Hakikisha unakuwa na vipimo sahihi vya meza yako kwa ajili ya kitambaa unachohitaji.

Makala hii imeandaliwa na Vivi O. Machange. Vivi anajishughulisha na usafi wa mazulia na nguo aina zote; pia ana mapenzi makubwa ya mitindo na mapambo ya nyumbani. Kwa maoni au maswali tuma kwenda viviobed@yahoo.co.uk au 0755 200023

My article for a newspaper: Kizulia cha jikoni

Malizia muonekano wa jiko lako kwa kuweka kizulia

Jikoni ni sehemu inayopitwa zaidi. Kwa familia zinazopenda mapambo ni kawaida kukuta kizulia kwenye maeneo ya mbele ya stovu na sinki au maeneo mengine ambapo mtu anasimama kwa muda mrefu jikoni.  Vizulia hivi sio tu vinasaidia kuhifadhi sakafu ya maeneo haya isisharibike zaidi ya yale mengine ambayo hayakanyagwi sana bali pia vinasaidia kuburudisha miguu. Na pia unaweza kuweka kizulia jikoni kwa lengo la kupamba. Vyovyote iwavyo, uchaguzi wa kizulia cha jikoni ni tofauti na vile vizulia vingine vya ndani. Unatakiwa kuzingatia uimara, umachachari wa kuzuia madoa na vifaa vilivyotengenezea kizulia husika. Makala hii itakuambia jinsi ya kuchagua na utunzaji wa kizulia cha jikoni kwa lengo la kumalizia muonekano wa jiko lako.

Miaka nenda rudi jikoni kwako pamekuwa ni mahali pa kufanyia kazi ya kuandaa chakula. Badili jiko lako liwe ni sehemu ambayo inavutia zaidi kwa mguso wa rangi za kizulia cha jikoni. Jikoni panapovutia panakuwa ni mahali unapotamani kwenda na si mahali ambapo inakulazimu kwenda. Unakapoweka jiko lako katika mandhari ya kuvutia utashangaa wageni wako wanaoingia kwa kupitia mlango wa nyuma wanakosea njia kwa kuelekea jikoni badala ya kuelekea sebuleni!

Kitu kizuri kuhusu vizulia vya jikoni ni kwamba viko tofauti na ukawaida wa muonekano wa jiko. Watu wengi wanang’ang’ania marumaru nyeupe au za rangi ya krimu jikoni na hii ni sifa ya rangi za jiko toka enzi na enzi. Kwa kuweka kizulia cha rangi tofauti utahuisha muonekano wa jiko lako.

Chagua eneo unalotaka kuweka kizulia , ambalo mara nyingi ni lile linalokanyagwa zaidi au linalokanyagwa kwa muda mrefu kwa mfano chini ya meza, eneo la kuingilia, mbele ya stovu au chini ya sinki au jokofu. Baada ya hapo pima ukubwa wa eneo hilo unalotaka kufunika kwa kizulia. Hii itakusaidia kutupilia mbali kizulia kikubwa sana au kidogo sana wakati wa manunuzi.

Chagua umbo la kizulia kwa kipimo na aina ya fenicha. Kwa mfano, kama unataka kizulia kiwe chini ya meza ya duara basi chagua kizulia cha duara. Amua kama kizulia hiki ni cha mapambo, je ungegependa kiwe cha rangi moja? Unaweza kuchagua rangi ambayo inaoana na ya kabati zako za jikoni au kaunta, au unataka kigeuze shingo kwa kuwa na michoro ya rangi zilizokolea.

Kizulia chenye rangi ya kukolea kitaonyesha madoa machache na uchafu kidogo. Zingatia pia urahisi wa kukisafisha kwani kizulia cha jikoni kiko kwenye hatari ya kupata madoa zaidi ya kizulia kwenye chumba kingine chochote.  Chagua kizulia ambacho hakitelezi kwa maana ya ukikikanyaga kisihame kutoka eneo moja kwenda jingine iwe ni kwenye sakafu ya mbao au marumaru kwani ni hatari kwa mtumiaji kwani kinaweza kumwangusha.

Doa kwenye kizulia cha jikoni linaweza kuwa chochote kutoka kwa mtoto, kikombe kilichoanguka toka juu hadi nyayo zenye tope. Kushughulikia madoa ya kizulia cha jikoni barabara ndio kunakotofautisha mabingwa wa usafi na watu wengine. Unaweza kujiita mtaalam kama utaweza kupambana na madoa ya kizulia chako cha jikoni. Ila kiukweli huhitaji nguvu nyingi kushughulikia madoa hayo.

Kwanza unatakiwa kuwa tu na hisia za kawaida. Kuchukua hatua mapema kuondoa doa lolote mara linapotokea kwenye kizulia cha jikoni kwa wakati huo huo.  Doa liliosahaulika litaumiza kichwa baadaye. Na doa la aina hii linaweza kuharibu kabisa muonekano wa kizulia chako. Kama ukiliacha doa bila kulishughulikia mapema linazama hadi mwanzo wa nyuzi za kizulia na hii itahitaji nguvu kubwa kulishughulikia. Kwahivyo kila wakati kuwa na hisia. Tenda mapema na kwa ufanisi.

Kuna madawa mengi yaliyoaminiwa kwa ajili ya kuondoa madoa ya kwenye zulia. Tembelea maduka yanayohusiana na mambo hayo uwe na dawa yako nyumbani wakati wote.

Kumbuka, jiko lako halitakiwi kuwa ni mahali pa kuandalia chakula tu. Unaweza kubadili jiko lako kuwa kivutio ndani ya nyumba yako kirahisi tu kwa kuleta mguso wa rangi na furaha japo kwa kuweka kizulia cha jikoni.

Makala hii imeandaliwa na Vivi O. Machange. Vivi anajishughulisha na usafi wa mazulia na nguo aina zote; pia ana mapenzi makubwa ya mitindo na mapambo ya nyumbani. Kwa maoni au maswali tuma kwenda viviobed@yahoo.co.uk au 0755 200023

My article for newspaper: bustani hewani

Una ardhi ndogo lakini unahitaji bustani? Fikiria vyungu vya kuning’iniza.

Vyungu vya maua vya kuninginiza ni njia inayopendwa ya kupendezesha makazi yako kwa kuotesha humo mimea utakayoipenda na kuvitundika kwenye maeneo ya ukuta utakayochagua iwe ni ndani au nje ya nyumba. Vyungu vya maua vya kuning’iniza vinasaidia kuongeza rangi kwenye ukuta wa nyumba yako, veranda na bustani. Vyungu hivi vinaweza kutumika kwa ufanisi hasa kwa nyumba yenye eneo dogo la nje na vinaweza kuwekwa kama mapambo kwenye eneo ambalo linahitajika kupambwa. Kama ukichagua maua vizuri bustani zako hizi za hewani zinaweza kudumu kwa miaka kadhaa kwa wewe kuvipaka vyungu rangi tofauti tofauti kuendana na msimu.

Sokoni kuna aina mbalimbali ya vyungu vya maua vya kuning’iniza. Fikiria ni vyungu vya namna gani vitaendana na mapambo yako  ya ndani kama unataka kuvining’iniza ndani ya nyumba na pia mandhari ipi itaendana vyema na bustani yako na maua unayotaka kuotesha humo. Vyungu vya maua vilivyotundikwa ndani kwenye maeneo ya kona ya ukuta vinafanya eneo la sakafu liwe huru na vinapendezesha ukuta wa kona, ule wa sehemu wa kuingilia na hata ule wa sebuleni. Sanaa za kuning’iniza sebuleni kwako zinawasalimia wageni, zinaelekeza njia na pia zinapambana kwa uzuri na rangi za ukuta Kama hutaki kuweka vyungu vya maua vya kuning’iniza ndani ya nyumba basi weka kwenye ukuta wa nje wa nyumba kwa maeneo ya dirishani kwa mfano vinafaa sana kwa kuleta faragha na maua yake yanavutia kuangalia ukiwa ndani.

Vyungu vya maua kwa ajili ya kuning’iniza vinatakiwa vile vyepesi. Hakikisha kuwa vyungu vyako vina matobo kwani udongo unaosimamisha maji muda wote unafanya mizizi ya mimea ioze kwa hivyo mimea kufa. Vyungu vya plastiki ni vyepesi ila tahadhari ni kuwa vinapasuka kirahisi ikiwa eneo vilivyotundikwa vinachomwa na jua kali. Vile vile vyungu vya maua vya kuning’iniza vinahitaji kuwekwa kwa vyuma imara kwani huwa vinakuwa vizito hasa wakati wa kumwagilia. Epuka kusababisha ajali kwenye familia yako pale chungu cha kuning’iniza kitakapomdondokea mwanafamilia.

Vyuma vilivyochimbiwa ukutani kwa ajili ya kushikilia vyungu vya kuninginiza vinatakiwa kuwa imara. 

Chungu chenye udongo na mimea kinaweza kuwa na uzito wa hadi kilo kumi na hiyo ni hata kabla ya kumwagilia. Halafu pia kumbuka kama chungu kimening’inizwa sehemu ambazo hazina paa ni kwamba maji ya mvua yatakuwa yanaingia moja kwa moja hivyo kukifanya kuwa kizito zaidi.

Kabla ya kutundika chungu chako cha maua cha kuning’iniza zingatia pia mahali unapokiweka. Je hali ya hewa ya mahali hapo kwa mfano jua la kuchoma mmea moja kwa moja halitauathiri? Ni upande upi upepo unakoelekea. Hali ya hewa ya joto kali na upepo utauvunja vunja mmea. Upepo mkali unaweza kuukausha mmea na pia kuvunja matawi madogo madogo. Halafu pia kama mmea unaootesha hautaki maji mengi mvua inaweza kuuozesha. Na kitu kingine zaidi cha kuzingatia ni kama katika eneo husika kuna kitu kinachoakisi joto kwa mfano lango la chuma linalopigwa na jua au pia kuna rangi za ukuta za namna hiyo hata kama mmea unastawi kwenye jua kali basi hali hii ya joto kuzalishwa maeneo ya karibu na chungu litauua mmea.

Kwa vyoyote vile, inatakiwa iwe rahisi kwako kumwagilia na kutunza bustani yako ya hewani kwa hivyo hakikisha mahali ulipochagua kuning’iniza chungu chako panafikika. Kwa mfano hutataka kuwa unakanyaga maua mengine ya bustani ya ardhini ili kukifikia chungu, na kama kimening’inizwa juu sana utahitaji jinsi ya kukifikia. Na zaidi ya urahisi wa wewe kukifikia chungu, angalia eneo ulilokining’iniza isiwe inabughudhi watembeaji wengine au inaziba muonekano.

Kama nilivyosema mwanzo kuwa chungu inabidi kiwe na matobo kumbuka kuwa kitadondosha maji baada ya kumwagiliwa, kwa hivyo kunahitajika kuwe na kisahani kinachoambatana na chungu au unakiteremsha chungu chini ukimwagilie halafu ukiruhusu kukauka ndipo ukirudishe juu. Lakini njia rahisi ni hii ya kuwa na chungu chenye kisahani cha kudondoshea maji kwani maji hayo hayo yanahitajika wakati maji kwenye chungu yanapokauka. Vyungu vya maua vya kuning’iniza na visahani vya kudondoshea maji ambavyo ni vya bei rahisi vinapatikana walau kwenye kila kituo cha bustani.

Sasa basi unafikia wakati wa kuotesha mimea kwenye chungu chako. Kuna mimea lukuki ya kuweza kuotesha kwenye vyungu vya kuning’iniza. Unaweza kuotesha mmea mmoja mmoja au mchanganyiko, iwe ni ya kusimama, kuning’inia ama yote kwa pamoja. Jua mimea inayostawi kwenye vyungu. Weka kwenye kundi moja mimea itakayovumilia mahitaji sawa ya maji, mwanga na joto. Maua mbali mabali inaweza  kuwekwa kwenye vyungu vya kuning’inia, ubunifu wako ndio kizuizi pekee. Inafurahisha kuona mmea ukikua kukubaliana na jinsi unavyouongoza. Katikati ya chungu weka mimea inayotoa maua kupata muonekano wa uhakika!

Ulishasikia hadithi ya bustani za kuning’inia za Babiloni? Bustani sio za ardhini tu, kama huna ardhi ya kutosha lakini unapenda bustani weka basi hizi za vyungu vya kuning’iniza uongeze uzuri angani!.

Makala hii imeandaliwa na Vivi O. Machange. Vivi anajishughulisha na usafi wa mazulia na nguo aina zote; pia ana mapenzi makubwa ya mitindo na mapambo ya nyumbani. Kwa maoni au maswali tuma kwenda viviobed@yahoo.co.uk au 0755 200023

My article for newspaper: Doormats

Uchaguzi na matumizi ya tandiko la mlangoni

Kwa nyumba nyingi wakati mgeni wako akifika mbele ya nyumba yako, kitu cha kwanza anachokutana nacho ni mlango uliofungwa na tandiko la mlangoni. Ingawa tandiko za mlangoni zina kazi ya kufutia miguu pia kuna njia mbalimbali ya kuzifanya ziwe ni kama mapambo ya kwenye nyumba.

Uchafu na unyevu  unaobebwa kwenye nyayo toka nje ya nyumba unaweza kuharibu sakafu na pia unachafua, na hii inamaanisha kutakuwa na hitaji la kufagia, kusafisha kwa mashine ya upepo au kudeki mara nyingi zaidi ya ambavyo ingekupasa.  Tandiko za mlangoni ambazo ni  jamvi kama ni nje ya nyumba ama kizulia kwa eneo la ndani ya nyumba; ingawaje watu wamekuwa wakizidharau ni njia yako ya mwanzo kabisa ya kuzuia uchafu, mchanga na udongo visiingie ndani. Tandiko hizi si za gharama kubwa na mara nyingine wala hazihitaji mvuto kwa hao wanaozitumia.

Weka tandiko za mlangoni kwenye sehemu zote za kuingilia na hasa zile zinazotumika zaidi. Kuendana na hali yako ya kuishi unaweza kuwa na milango ya pembeni na ya nyuma zaidi ya ule wa mbele. Hakikisha kuwa yote ina tandiko za mlangoni. Pia kwenye sehemu ambazo hazijamaliziwa kwa mfano kwenye banda la gari ambalo lina mlango mdogo wa kuingilia ndani hakikisha napo unaweka jamvi mlangoni.

Tandiko za kukanyagia kwenye milango ya nje yaani jamvi chagua ambazo zina matobomatobo au zenye nyuzi zilizo kama brashi. Jamvi zinaweza zisionekane kuwa na mvuto lakini ni madhubuti kwa kufutia viatu na zinadumu muda mrefu, zinafanya kazi nzuri sana kama tandiko za milango wa nje. Zitumie nyumbani kwa eneo lenye matope na kwenye banda la gari au kwa mlango wa nje wa pembeni na wa nyuma kama huzitaki kwenye mlango wa mbele.

Pia waweza kuweka kile chuma cha kutolea matope pale ambapo kuna (au unategemea) kuwe na matope mengi na watie watu moyo kukitumia pale wanapokuwa wamebeba tope kubwa kwenye viatu vyao.

Chagua tandiko hizi za mlangoni kwa kuzingatia zinawekwa ndani au ni nje. Tandiko za mlango za ndani zinaonekana zaidi kama vizulia na zinasaidia kufuta majasho ya miguu. Hakikisha mlango unaweza kufunguka vizuri kizulia kikiwepo.

Kwa hivyo tandiko za mlangoni zinaweza kukaa kwa ngazi tatu kutokana na mahitaji yake. Zile za nje kabisa zikiwa ni kama brashi zikifuatiwa na za mseto ambazo ni mchanganyiko wa kubrashi na kunyonya majasho na za mwisho zikiwa ni laini kama zulia ambapo zote hizi zinasaidia kudaka uchafu kwa ngazi zote ili kuondoa kabisa uwezekano wa uchafu wa nje kuingia ndani.

Kama jamvi zitakuwa maeneo ambayo zitaloa mvua chagua staili ambayo itakauka haraka. Chagua zulia za mlangoni za ndani ambazo hazitaharibu sakafu ya chini yake na ambazo zitaendana na mapambo ya ndani yaliyopo. Je kizulia husika ni kwa ajili ya mapambo tu? Chagua rangi ambazo hazitaonyesha uchafu kwa mfano nyeusi na damu ya mzee na pia rangi zisizochuja.

Safisha jamvi na vizulia vya mlangoni mara kwa mara. Inawezekana vikajaa uchafu kiasi kwamba havisafishi viatu tena bali ndio vinavyochafua. Kung’uta, safisha kwa mashine ya upepo au fagia takataka zilizo juu juu. Kama tandiko ni kavu hatua hii itasaidia kuondoka uchafu mwingi kabla ya kusafisha kwa kulowesha kwa kuzipiga maji yenye shinikizo.

Vua viatu vyako wakati unaingia ndani mwako, hasa kama umetokea sehemu yenye matope au udongo mwingi. Jenga njia ya kuingilia kwa sakafu ngumu ili kufanya mazingira masafi kabla hujaingia ndani.

Kwa kuwa tandiko za mlangoni zipo za aina nyingi kutokana na matumizi baadhi ya watu wanapata taabu wakati wa kuchagua tandiko sahihi kwa mahitaji na ladha yao. Kwa sababu hiyo basi jiulize maswali mawili pale unapohitaji kununua tandiko jipya la mlangoni, ambayo ni “ unaenda kulifanyia nini hilo tandiko na unaenda kuliweka wapi?” Majibu ya maswali haya mawili rahisi yatakuongoza wewe mnunuzi na muuzaji kupata tandiko litakalokufaa kuendana na hitaji lako.

Makala hii imeandaliwa na Vivi O. Machange. Vivi anajishughulisha na usafi wa mazulia na nguo aina zote; pia ana mapenzi makubwa ya mitindo na mapambo ya nyumbani. Kwa maoni au maswali tuma kwenda viviobed@yahoo.co.uk au 0755 200023