KOVA: MAFURIKO YAMEUA 12 DAR

JESHI la Polisi Kanda Maalumu ya Dar es Salaam, limesema watu 12 wamethibitika kupoteza maisha jijini humo kutokana na athari za mafuriko ya mvua zinazoendelea kunyesha.

Taarifa iliyotolewa Dar es Salaam

jana na Kamanda wa Kanda hiyo, Kamishna Suleiman Kova, ilisema idadi hiyo ni ongezeko la watu wanne kutokana na taarifa ya awali iliyotolewa na jeshi hilo juu ya vifo vya watu wanane.

Alisema Mei 9, mwaka huu, saa 12 asubuhi katika Bonde la Mto Mkwajuni, Mtaa wa Makuti, Magomeni, wilayani Kinondoni, ulipatikana mwili wa mwanamke anayekadiriwa kuwa na umri kati ya miaka 40-45, ambaye hakufahamika jina lake wala

makazi, akiwa amevaa nguo aina ya dera rangi ya njano.

Aliongeza kuwa, mwili wake umehifadhiwa katika Hospitali ya Muhimbili kwa utambuzi ambapo mtu mwingine Valerian Eradius (13), mwanafunzi wa kidato cha kwanza, Sekondari ya Kigogo, mkazi wa Mburahati kwa Shebe, alifariki dunia Mei 10 baada ya kuangukiwa na ukuta.

"Mei 8, mwaka huu, maeneo ya Mbezi Beach Kilongamiwa, Tarafa ya Kawe, wilayani Kinondoni, mtu mmoja Gervas Shayo (28), mkazi wa Mbezi Juu alikufa maji na mwili wa marehemu umehifadhiwa Hospitali ya Mwananyamala.

"Mtu mwingine anayekadiriwa kuwa na umri kati ya miaka (35-38) ambaye jina, umri wala makazi yake hayajajulikana, ameopolewa katika tope leo (jana), maeneo ya Magomeni Suna katika Bonde la Mto Msimbazi akiwa amefariki, mwili wake upo Hospitali ya Muhimbili," alisema.

Kamishna Kova aliongeza kuwa, uzoefu unaonyesha jinsi maji yanavyoendelea kupungua, madhara yanaendelea kuonekana; hivyo aliwataka wananchi kutoa taarifa mapema ili hatua zichukuliwe  mara moja pamoja na kuiondoa miili ya watu waliokufa kutokana na athari za mvua hizo.

MAJIRA