My Article for Newspaper: Jiko lenye mpangilio

Siri ya jiko lenye mpangilio mzuri

Muulize mwenye nyumba yeyote, atakuambia kuwa kati ya vyumba vyote kwenye nyumba yake, jikoni ni sehemu ambayo inatumika zaidi. Iwe ni kwa kupika, kula au hata burudani chumba cha jiko kinatumika kuliko vyumba vingine vyote. Kama mama uliye na shughuli nyingi unatakiwa kuwa na jiko lenye mpangilio wa kurahisisha shughuli ya kuandaa chakula bora kwa ajili ya familia yako. Hii inawezekana kwa kuwa na kila unachohitaji mkononi kwa maana ya kwamba kutoanza kutafuta chombo kimoja kimoja wakati wa kuandaa chakula kuanzia kisu, sufuria, kitaulo na hata sabuni ya kusafishia. Wakati unapokuwa una kila kitu unachohitaji kwenye ncha ya vidole vyako ni wazi kuwa utaandaa chakula bila msongo wa mawazo!

Kutokana na shughuli na matumizi mengi ya jiko ni muhimu jiko lako liwe na mpangilio mzuri kadri iwezekanavyo ili kuweza kurahisisha mambo. Hata hivyo kutokana na vitu vingi ambavyo jiko linabeba – vyakula, sufuria, vijiko, visu sahani vikombe,vifaa vya umeme na kadhalika ni kawaida kukuta kuwa chumba hiki ambacho kinatumika zaidi ndio chenye mpangilio dhaifu kuliko vyote.

Lakini jipe moyo kwa kusoma makala hii unaweza kuwa na mpangilio mzuri jikoni kwako.

Ondoa mrundikano kwenye kaunta za jiko. Hifadhi uma, visu na vijiko kwenye droo na sio kwenye kaunta ndani ya kibebeo. Kuondoa mrundikano kwenye kaunta kutafanya jiko liwe na mpangilio na mvuto.

Safisha makabati na weka vyakula kwenye makontena yenye mifuniko. Kuacha vyakula vya maboksi vilivyofunguliwa tayari kwenye makabati kunaleta mende, panya na wadudu wengine jikoni. Kwa hivyo vyakula vyako kama unga na mchele weka kwenye kontena zenye mifuniko isiyoingiza hewa, namna hii itakuwa rahisi kuchukua vyakula kirahisi wakati wa kupika na pia kuvihifadhi visishambuliwe na wadudu na kuokoa hela yako kwa vyakula kubaki na ubora wa awali kwa muda mrefu!

Wekeza kwenye zana sahihi za kuweka mpangilio mzuri jikoni kwenye makabati ya vikombe, vikaangio na sufuria.

Tembelea kwenye jokofu. Umeshaangalia kwenye jokofu na ukakutana na mboga mboga na matunda? Osha vyakula vinavyotakikana kuwekwa kwenye jokofu na viweke kwanza ndani ya kontena au mifuko inayoonyesha vilivyomo ndani, baada ya hapo ndio uweke ndani ya jokofu. Kuwa na vyakula ndani ya jokofu vilivyohifadhiwa kwenye kontena kunarahisisha kupata unachotafuta wakati wa kupika au wa kuandaa orodha ya sokoni. Watu wengi hawachukui muda kupanga ndani ya majokofu yao, lakini nguvu zinazotumika hapo zinalipa kwa ajili ni njia rahisi ya kuokoa muda, pesa na nafasi. Panga vyakula kwenye shelfu za jokofu kwa mtiririko wa kueleweka kwa mfano shelfu la mbogamboga, la matunda, la vitafunwa na kadhalika. Fanya milango ya jokofu iwe ni kwa ajili ya vitu vya kipekee kama dawa. Mpangilio huu utasaidia kutokuwa na jokufu lenye mrundikano na hivyo kuokoa muda wa kupata kile unachotafuta.

Watu wengi hawapendi kusafisha jiko baada ya chakula cha usiku, lakini kwa bahati mbaya ni lazima jiko lisafishwe ili lisiwe makazi ya mende, panya na wadudu wengine watakaokuja kujifaidia makombo ya vyakula wakati wa giza. Ili kupunguza kazi ya kusafisha baada ya chakula ni vyema kusafisha kidogo kidogo kadri unavyopika na sio kuacha kila kitu hadi mwishoni. Kwa mpishi anayependa kuweka jiko safi ataendelea kufuta kaunta wakati huo huo anapika. Hakikisha jikoni kunakuwa na sabuni maalum za kusafisha jiko.

Pamoja na ajira, kuweka nyumba safi na kulea familia, inaweza kuwa ngumu kwa mama yeyote kuwa na mpangilio mzuri jikoni, lakini sio kwamba haiwezekani. Cha muhimu ni kuwa hakikisha jiko lako linakuwa kwenye mpangilio ambao chochote unachohitaji hapo unakipata mara moja na hata kwa mwanafamilia mwingine inakuwa hivyo hiyvo. Ijulikane kwa wanafamilia wote kwa mfano visu vinakaa hapa, sahani zinakaa pale na kadhalika. Mara unapoweka jiko lako kwenye mfumo wa mpangilio fulani basi ng’ang’ania mfumo huo. Kwa bahati nzuri kama una mwenza anayekujali basi mama wa familia unaweza kuwa kama mashine iliyotiwa mafuta vizuri na kuweza kumudu majukumu yako mengine na wakati huo huo kuwa na mpangilio utakaoleta mvuto na kurahisisha maisha jikoni.

Makala hii imeandaliwa na Vivi O. Machange. Vivi anajishughulisha na usafi wa mazulia na nguo aina zote; pia ana mapenzi makubwa ya mitindo na mapambo ya nyumbani. Kwa maoni au maswali tuma kwenda viviobed@yahoo.co.uk au 0755 200023

My article for newspaper: Ukuta wa nje ya nyumba

Jinsi ya kupamba ukuta wa nje ya nyumba  yako

Kupamba ukuta wa nje ya nyumba kunahitaji mpango ulioandaliwa. Unatakiwa uangalie vitu kama hali ya hewa, sanaa za mapambo na rangi ya ukuta. Muunganiko wowote wa rangi, mimea na  sanaa za ukutani vinaweza kutumika kama nyenzo za kutengeneza ladha yako binafsi kwenye ukuta wa nje wa nyumba. Kumbuka kama nyumba ni ya kupanga hakikisha unapata baraka za mwenye nyumba!

Moja ya njia rahisi zaidi za kuhuisha au kubadili muonekano wa kuta za nje ni kupaka rangi.  Kabla fundi rangi hajaanza kazi yake hakikisha marekebisho yote yanayohitajika kwenye ukuta yamefanyika kwanza, kwa mfano kuziba nyufa na kadhalika. Kwa ujumla maandalizi ya ukuta kabla ya kupaka rangi sio kitu rahisi sana kwa hivyo hakikisha unapangilia vyema ili kupata matokeo unayohitaji. Kama kuta hizo hazijawahi kupakwa rangi hakikisha unafikiria kwa makini juu ya nini unachotaka kama umeamua kuzipaka rangi.

Paka rangi ambayo ni maalumu kwa kuta za nje na shirikisha wataalamu wa mambo ya rangi, uchanganyaji  na upakaji wake. Hii ni muhimu kwani rangi za kuta za nje ya nyumba ni tofauti na zile za kuta za ndani kwani hizi za kuta za nje zina uwezo wa kupambana na hali ya hewa ya nje, wadudu kama fangasi na pia zinasafishika kirahisi kwa maji. Mara kuta zako zinapokuwa zimepakwa rangi zingatia kuzitunza kwa kuwa mradi wa kupaka rangi ni mkubwa kwahivyo sio kazi ungependa kufanya kila baada ya miezi kadhaa.

Mifereji ya maji ya mvua ijulikanayo kama gata nayo isisahaulike kupakwa rangi. Iwe gata ni za chuma au plastiki kuna rangi zake mahsusi kwa nje na ndani hasa ukizingatia kuwa ndani inakuwa inaloa maji kila mvua zinaponyesha. Maeneo ambayo yana chuma kwenye mifereji hii nayo yanaandaliwa kitaalamu kuzuia kutu kama nilivyosema awali kuwa hakikisha unafanya kazi ya kupaka rangi na wataalamu.

Kuta zilizopo karibia na majani, otesha vichaka vya maua na miti  katika uwiano utakaoleta rangi nzuri ya muonekano wa maua ya asili. Kama ni muhimu unaweza pia kuotesha maua kwenye vyungu vidogo vya maua vya kuninginiza ukutani.

Kuna nyenzo nyingi zilizopo za kuweza kuweka urembo ukuta wa nje ambazo ni pamoja na mbao, tofali, marumaru au mawe kama yale ya Tanga. Tumia nyenzo hizi kwa ukuta mzima au kwa maeneo ya chini tu. Kona ambazo hazina kitu zinaweza kupendezeshwa kwa urembo wa mawe au chuma.

Mapambo mengi ya sanaa kwenye nyumba mara nyingi yanawekwa sebuleni au zile sehemu ambazo burudani inafanyika.  Lakini wakati  kuta za ndani zinaweza kuwa za kupendeza kwa sanaa za aina mbalimbali, watu wengi wanaweka juhudi kidogo kupamba kuta  za nje ya nyumba  wakati kiukweli ndizo wageni wanazoona kwanza.

Kupamba kuta za nje kutafanya hata  zile za ndani yavutie zaidi. Kupamba ukuta wa varanda kwa mfano, kwa sanaa nzuri za kuta za nje itasaidia kusisitiza uzuri wa mazingira ya eneo hilo.  Kuna aina nyingi za kuchagua ambazo zitaendana na jengo na pia ladha ya mwenye nyumba.  Vinyago vya ukutani pia vinaweza kuongeza staili kwenye ukuta wa nje uliokaa bila pambo. Na mapambo haya hayatakiwi kuwa ghali, kwa mpango mzuri na umakini hata ile sanaa ya bei rahisi kabisa inaweza kuleta mvuto wa ajabu. Kinachotakiwa tu ni kuchagua mandhari fulani na chagua sanaa sahihi za kuendana na mandhari uliyochagua.

Fremu kubwa kwa mfano inasaidia kuleta mvuto maalumu kwenye ukuta mtupu. Chagua fremu kubwa za picha za kanvasi zenye mandhari uliyochagua kupamba ukuta wako wa nje ya nyumba. Sanaa chache tu zilizowekwa kimkakati kwenye ukuta wa nje zitaleta tofauti kubwa.

Mapambo ya ukuta wa nje yanapendezesha nyumba yako kama vile ya ukuta wa ndani. Njia mojawapo ya kupata sanaa za kupamba ukuta wa nje ya nyumba ni kupiga picha makazi yako na kujitengenezea picha kubwa za fremu. Fremu hizo  pambia  kwenye kuta za  maeneo ya varanda, bwawa la kuogelea na hata zile  za bustani. Zingatia ubora wa sanaa ambao utaweza kupambana na kupauka kutokana na jua na pia unyevu na kubanduka rangi.

Makala kama hii, katalogi na mtandao vinakuwezesha kupata mawazo ya mapambo ya ukuta wa nje. Mara nyingine mapambo haya kama picha za fremu za kanvasi zinaweza kuwa ghali lakini hutajutia hela yako kama ni tamanio la moyo wako kwani mapambo haya yatakufanya kujisikia raha na kuridhika na jinsi ambayo mahali unapoishi panavyoonekana.

 

Makala hii imeandaliwa na Vivi O. Machange. Vivi anajishughulisha na usafi wa mazulia na nguo aina zote; pia ana mapenzi makubwa ya mitindo na mapambo ya nyumbani. Kwa maoni au maswali tuma kwenda viviobed@yahoo.co.uk au 0755 200023

furushi la wiki

nguo za kuvaa wiki nzima za binti wa mteja wangu dada J ..

nafurahia uonekane smart na uishi pasafi

zulia lililofuliwa tayari

duvet limeshafuliwa, nyooshwa na limeshapakiwa linamsubiri mwenyewe

nguo na zulia zilizofuliwa Ian Dry Cleaners & Laundry

mfuaji

wiki nzima kwa 25K tu!

baada ya kazi ni mapumziko kidogo

Ian Dry Cleaners tunakufulia na kunyoosha nguo za kuvaa wiki nzima kwa elfu 25 tu. Maisha yanakuwia rahisije!

My article for newspaper: Mito ya sakafuni

Tumia mito ya sakafuni kwa kukalia na kama pambo

Mto wa sakafuni ni kusheni kubwa linalotumika sakafuni kama pambo au mahala pa kukalia. Mto huu huwa umejazwa zaidi na ni mgumu kuliko mito ya kawaida ya kwenye sofa ili kuweza kuhimili uzito wa mwili. Mara nyingi mito hii ni mikubwa na hutumika kukalia wakati wa burudani kama vile wakati wa kutazama  luninga na pia ni nyongeza ya mahali pa kukalia kwenye vyumba vya michezo ya watoto.

Mto wa sakafuni unaweza kuwa na umbo lolote liwe ni duara, boksi ama mraba. Weka mito yako mitatu juu ya kizulia chako cha kutupia na mara utagundua kuwa umetengeneza sehemu ya nyongeza ya kukalia wakati wa burudani au mahali poa pa kusoma na kustarehe. Chagua mito ambayo itaendana na kizulia chako. Mpangilio wa kizulia hicho na mito yenye rangi za kukolea utaleta mvuto. Pia unaweza kupendezesha sakafu yako ya marumaru au mbao kwa kutupia mito ya sakafuni. Chagua rangi za ladha yako kuendana na rangi ya sakafu ili kuleta muonekano wa mapambo ya kisasa.

Mito ya sakafuni ni pambo rahisi ambalo kila nyumba inaweza kuwa nalo. Kama wazo lako la mito ni kuweka kwenye sofa  tu; basi unahitaji kuchukua muonekano mwingine. Mito hii inakuja kwa saizi mbalimbali kwa jinsi ambayo inaweza kumfurahisha kila mtumiaji awe ni mtoto, kijana ama mtu mzima. Unakutana na matumizi mengi ya mito mikubwa ya sakafuni na utashangaa ni kwa vipi unaweza kuishi bila hiyo. Hata kwa kukaa tu na kutulia kutafakari maisha au kucheza karata karibu na meza ya kahawa, mito ya sakafuni inafanya kukaa sakafuni kuwa ni raha na shughuli zako kuwa za starehe zaidi

Watoto wanaipenda! Ni muhimu wakati wa kucheza na watoto. Ukiwa unakaa karibu na watoto mara kwa mara utaanza kugundua ni muda mwingi kiasi gani wanaoutumia sakafuni.  Na pia ni muda mwingi kiasi gani wanapenda ukae nao hapo sakafuni! Kama una mtoto mdogo utakugundua kuwa mto mkubwa wa sakafuni ni sehemu tosha kwa usingizi kwa mchana.

Pia kwa swala la usalama, watoto wadogo hawako makini kihivyo; na hasa wanapokuwa wanakimbia na kuishia kujirusha kwenye sofa. Ndio hapo wapohitaji mto mkubwa wa sakafuni kuangukia. Na hata wanapong’ang’ania kubembea kwenye mikono yako hadi unaposikia kama mikono inataka kung’oka, basi sehemu ya kuwatulizia ni kwenye mito ya sakafuni.

Kwa kuhurumia magoti yako idadi ya mito inavyoongezeka ndio na uzuri wake unavyoongezeka. 

Kwa nini ukae tu juu ya kizulia uumizwe na sakafu wakati kuna mto mkubwa wa kunesa ambao ungeweza kuukalia? Wakati familia yako ikiendelea kukua na sehemu ya kuweka fenicha imeshajaa, mito mikubwa ya sakafuni ni mbadala tosha wa viti. Kwa mikutano ya familia na marafiki wakati ambapo hamna viti vya kutosha hufurahii wale wanaoshia kukaa sakafuni wapate starehe (hata kama ni watoto?)

Mito ya sakafuni inayokunjika ni chaguo zuri. Hii ina sehemu tatu, kunjua wote kama unataka kulala kwa tumbo; halafu kama unataka kukaa kwa muda; ukunje zile sehemu mbili ili usaidie mgongo na sehemu ya tatu kalia. Mito ya aina hii pia ipo ya kufanana kama fenicha kabisa ambayo ina hadi sehemu za kupumzisha mikono.

Je una kimnuso cha binti yako mdogo nyumbani? Ni nini kinachoweza kuwa rahisi zaidi ya kuweka nusu dazeni ya mito hii kwenye sakafu ya sebule yako. Wacha waangalie katuni hadi wasinzie halafu waache hapo, ukijua kuwa wana kitanda na mto pamoja! Kwa hivyo kama isivyo kwa mapambo mengine ya ndani, mito ya sakafuni inawekwa kwenye matumizi ya kukalia na mapambo kwa wakati mmoja.

Mito ya sakafuni inaweza kuwa kwenye kitambaa chochote utakacho hadi kwenye ngozi na hata plastiki kwa ajili ya ile ya kwenye varanda. Baadhi ya watu wanapenda kuoda mito ili watengenezewe kuendana na mapambo yao mengine ya ndani au hata mapambo ya chumba husika. Ingawa hii inaweza kuwa gharama zaidi lakini inakuwezesha kupata foronya za rangi upendayo na utakazoweza kubadilisha kadri upendavyo.

Kama unataka kuburudisha nje ya nyumba kwenye varanda yako tafuta mito ya sakafuni ya nje. Mito hii ya sakafuni ya kwenye varanda inatengenezwa kwa foronya za kudumu kwa mfano za kanvasi, ngozi ama plastiki, ili kujikinga na unyevu maji na hata kuzuia kupauka kirahisi. Wakati usioihitaji ihifadhi stoo ili kuiwezesha idumu.

Mito ya sakafuni inatumika kama pambo na mahali pa kukaa pale ambapo urefu wa kiti ama usaidizi wa kina wa mgongo hauhitajiki. Kama unavyoweza kuona, jinsi ambavyo mto wa sakafuni unavyoweza kutumika kama pambo au kama fenicha nyumbani kwako ubunifu tu ndio unahitajika. Wageni wako watu wazima wanaweza kuunganisha mito ya sakafuni kadhaa wakavuta shuka na tayari kuwa kitanda bandia  cha mgeni Kwa hivyo unasubiri nini kuwa na mito ya sakafuni?

Makala hii imeandaliwa na Vivi O. Machange. Vivi anajishughulisha na usafi wa mazulia na nguo aina zote; pia ana mapenzi makubwa ya mitindo na mapambo ya nyumbani. Kwa maoni au maswali tuma kwenda viviobed@yahoo.co.uk au 0755 200023