Tuseme una kabati
lako la vyombo ambalo lina vipande viwili – kipande cha juu kikiwa na milango
ya kioo na cha chini kikiwa na milango ilisiyoonyesha kilichomo ndani kwa mfano
milango ya mbao au malighafi nyingine. Kwa kawaida sehemu ya chini ya kabati haina
mvuto ila hii ya juu ndio inavutia.
Kwa pamoja sehemu hizi mbili
zinajitosheleza na kuleta muonekano wa kabati moja kubwa lililokamilika, refu
linalokaribia kugusa dari.
Wengi
mtakubaliana na mimi kuwa mnatumia sehemu ya chini kwa vyombo vyote lakini hii
ya juu mnaitumia kuweka vile vyombo vyenye mvuto.
Ukitumia kabati
hili kama ilivyokusudiwa, linaleta mvuto wa kipekee kwenye chumba cha chakula
au sebuleni.
Sasa changamoto ni kuwa wapo ambao hawajui ni vitu gani zaidi ya
vyombo ambavyo wanaweza kuweka kwenye kabati lao hilo! Hivyo basi zifuatazo ni
dondoo za kukufahamisha vitu zaidi ya vyombo unavyoweza kuweka kwenye kabati la
vyombo na kuliwezesha livutie zaidi:
Kutegemea na ni wapi umeweka kabati, unaweza
kulitumia kuweka vitu vya ziada kama vitabu, majarida au vitambaa vya mezani na
vitaulo vya jikoni.
Unaweza kuweka chochote ambacho unakipenda na
pia kitapendeza machoni mwa wengine kama vile fremu za picha za familia na
inasemekana zile picha za rangi nyeupe na nyeusi ndio zinafaa zaidi, mikanda ya video na mziki. Kuwa
mbunifu!
Glasi, sahani, vyungu na birika za mapambo tu
na sio kwa ajili tu kutumika.
Unaweza kutandika kitambaa cha mapambo juu ya
kabati. Naamini msomaji wangu kama wewe ni mtu wa zamani unakumbuka nyakati
ambao wengi walikuwa wanatandika vitambaa vya kijani vilivyodariziwa juu ya
makabati ya vyombo. Vivyohivyo leo hii unaweza kuwa na kitambaa cha rangi au
michoro unayoipenda na ukakitandika juu ya kabati la vyombo.
Unaweza kuweka vishikio vya mishumaa na
mishumaa.
Unaweza pia
kuweka vitu vya msimu wa sikukuu.
Kwahiyo una
sehemu mbili za kuweka vitu zaidi ya vyombo kwenye kabati lako la vyombo. Juu
ya kabati na ndani kwenye milando ya kioo, zitumie ipasavyo kuleta umaridadi.
No comments:
Post a Comment