Namna ya kubandika stika za mapambo ukutani

Stika za mapambo ni karatasi nyepesi ambazo zimekatwa katika miundo tofauti ya maua. Stika hizi zinabandikwa ukutani kwa ajili ya kupendezesha nyumba. Bila shaka msomaji wangu umeshasikia kuhusu karatasi nyingine za ukutani maarufu kama

wallpaper. Tofauti ya stika na wallpaper ni kwamba stika inawasilisha ua likiwa limejitegemea/limejitenga, wakati wallpaper ina maua mengi pamoja na hata kama sio maua yapo maumbo mengine mengi kama ya mawe ya mtoni, vitofali na kadhalika. Ila kwa upande wa stika hizi za ukutani za mapambo nyingi ni za muundo wa maua tu.

Ili stika zijishike vizuri ukutani na kuonekana maridadi unatakiwa uzibandike kwa usahihi.  Kwanza ni lazima ukuta unaobandikwa stika uwe umeandaliwa sawasawa. Stika za ukutani zinahitaji ukuta laini, hazijishiki kwenye kuta zilizo rafu au chafu. Kama ukuta uko rafu unapaswa kumwita fundi aufanyie finishing ikiwa ni pamoja na kuupaka rangi. Hakikisha rangi unayopaka haifanani na stika ili kufanya ua la stika lichomoze na kuonekana bila kuumiza macho.

Unatakiwa kutumia sponji lenye maji na sabuni kusafisha eneo unalotaka kubandika stika ili kuondoa uchafu wa vumbi, mafuta na mwingine wowote unaoweza kuwepo. Baada ya kusafisha acha ukuta kwa muda kuruhusu ukauke kabisa.

Kuwa makini wakati unapobandika stika kwani lengo kuu la stika za ukutani ni kwa ajili ya kupendezesha ukuta tu. Hii ina maana unapaswa kuangalia lile eneo unalotaka kubandika, je stika itaonekana na itavutia? Hutataka kuingia gharama ya kununua stika halafu uibandike mahali ambapo baadaye patawekwa kabati au chochote ambacho kitaificha.

Kawaida huhitaji gundi ya nyongeza kubandikia kwani tayari ipo nyuma ya stika. Nakushauri kwamba kabla hujabandua karatasi ya nyuma inayohifadhi gundi, chukua tepu za mafundi ujaribu kubandika stika nzima kwanza ili usimame kwa mbali uone itakavyokuwa baada ya bandiko halisi. Hapo unaweza kurekebisha hadi kujiridhisha halafu weka alama kwamba ndipo utakapobandika stika yako. Na pia kuna stika ambazo  zina vipande zaidi ya kimoja. Kwahivyo hii pia itakusaidia kuona ni kwa namna gani vitahusiana katika muonekano unaotaka mwishoni.

Sasa unakuwa umefikia wakati wa kubandika kwa uhalisia. Kukwepa uharibifu bandua kwa hatua  ile karatasi ya nyuma inayohifadhi eneo la gundi. Anza kubandua eneo dogo huku ukiendelea kubandika ukutani eneo unalobandua. Yaani usibandue yote kwa pamoja kwanza halafu ndio ubandike kwani gundi zinaweza kushikana pengine kwasababu ya upepo na ukashangaa stika yako imeharibika usiweze tena kuibandika.

Tumia  kiganja cha mkono wako wa pili kukandamiza na kusambaza stika ili isiache mituno. Ukishamaliza kubandika taratibu bandua karatasi nyepesi ya juu ambayo watengenezaji wanaiweka ili kukinga mikwaruzo au uharibifu wowote wa maua ya stika. Ndiposa unafurahia mng’ao wa stika yako na tayari unakuwa umekamilisha.

Simu 0755 200023. Kununua stika click kwenye VINAVYOUZWA hapo juu. Asante