Njia 5 za kufufua sofa zilizochoka

Kama sofa zako zinaonekana kuchoka, lakini bado hujakata tamaa kwamba uachane nazo jaribu kuzifufua kwa kutumia njia  moja au zaidi ya hizi tano. Unaweza kushangaa ni kwa namna gani utapata matokeo makubwa na ya kuridhisha.

Tupia mito mipya

Njia rahisi na nyepesi kuliko zote ya kufufua sofa ni kuweka

mito mipya. Mito ina nguvu ya kubadilisha muonekano kwa njia zisizo na kikomo. Unaweza ukacheza na rangi, michoro, maumbo na hata malighafi iliyotengenezea foronya za mito. Kama sofa unazotaka kufufua zina rangi nyeusi au isiyoegemea upande wowote tupia mito ya kuwaka kama vile rangi za chungwa, nyekundu au kijani cha ndimu na pia mito yenye doti doti za polka. Kama hizo sofa ni za maua tupia mito ya rangi moja na kama zina kitambaa cha rafu tupia mito ya kitambaa laini. Mito ya sofa inakuja kwa kila staili kwahivyo huwezi kukosa unayotaka.

Shonea kitambaa kipya

Vipo vitambaa vingi vya sofa vyenye maua, vya rangi moja au hata vya michoro mbalimbali ambavyo unaweza kumpelekea fundi akashonea upya kwenye sofa zako. Pia uzuri wa sofa nyingi za kisasa zina kava za kuvulika. Fundi sofa Adam Kajembe anasema, ni eneo dogo sana kama vile zile sehemu za kuwekea mikono na mgongoni ambapo itamuhitaji fundi kushughulika nayo moja kwa moja kwenye sofa . Na hasa kama sofa zenyewe ni za kutengeneza hapahapa nchini basi una bahati maana itakuwa ni kazi rahisi zaidi.

Badilisha miguu

Ndio, ni kweli! Unaweza kufufua muonekano wa sofa zako na kuzipa muonekano mpya kwa kubadilisha miguu yake. Uzuri wa sofa zinazotengenezwa siku hizi zimeunganishwa miguu tofauti na fremu la sofa yaani miguu sio muendelezo wa moja kwa moja toka eneo la kukalia. Mara nyingi mgongo, kiti na eneo la kuweka mikono zimetengenezwa kama kitu kimoja na baadaye miguu ndio inafungwa, anasema Adam. Kwa hivyo kama unataka kufanya mabadiliko ni rahisi sana. Aidha unaweza kufunga miguu mipya au unaweza kupulizia upya rangi miguu ya zamani na kuifunga tena na utashangaa tofauti utakayoona.

Jazia kusheni zilizosinyaa

Kusheni hapa tunaongelea ile mito inayokuja/inayotengenezwa na sofa ili kulikamilisha. Kusheni zinachukua nafasi kubwa zaidi kwenye muonekano wa sofa. Mito hii ni muhimu na hatuwezi kuilinganisha kiutendaji na ile ya mapambo ya kutupia. Bila kusheni ni ngumu mgongo wa mkaaji kuwa na uwiano mzuri na sofa hilo. Sasa basi, kuendana na malighafi zilizojazwa ndani kutengeneza kusheni hizo, kuna wakati zinakuwa zimesinyaa. Fundi Adam anashauri tengeneza foronya jipya la kitambaa kinene (mithili ya mablanketi na maduveti) halafu uchukue malighafi iliyosinyaa (bahati nzuri kusheni nyingi zina zipu) na kuongezea pamba au faiba za kujazia mito zinazouzwa madukani. Baada ya hapo funga mto huo na uvalishe foronya ya nje na ndipo unakuwa na kusheni jipya ambalo halijasinyaa. Sababu ya kutengenezea foronya la kitambaa kinene ni kuepuka mabondemabonde kwenye kusheni lako.

Badilisha vitu vinavyozizunguka

Japo njia hii si ya kugusa sofa moja kwa moja, ila kuna wakati unaweza kufufua sofa kabisa kwa njia tu ya kuboresha vitu vinavyolizunguka.. Jaribu kutundika picha mpya au hata kubandika karatasi za ukutani yani wallpaper nyuma ya ukuta ilipo sofa. Zikiwa zimezungukwa na vitu tofauti na vizuri, sofa zako zinaweza kuvutia pia!

Simu 0755 200023