Tairi chakavu zinavyopendezesha bustani

Kwa nyumba nyingi ambazo wenyeji wana magari watakubaliana na mimi kuwa matairi chakavu wakati ulipoyaondoa kwenye gari kama hukuyaacha kule gereji basi yameishia kurundikana eneo la nje ya nyumba yakikusanya vumbi, taka mbalimbali na makazi ya wadudu. Badala ya kuyaacha gereji au kuyatupa je, kwanini usiyabadilishe kuwa kitu cha kuvutia na vilevile cha manufaa?

Mpira unaotengenezea tairi hakika ni

malighafi imara na sahihi kwa matumizi ya nje. Hakuna tahadhari yoyote ya kutumia matairi haya bustanini. Mara yanapowekwa mahali hayaozi na kuna uwezekano wa kuwa hapo hadi yakatumika na wajukuu zako endapo hutayaondoa!

Katika makala hii nitakuelimisha njia kadhaa za kiuubnifu ambazo unaweza kutumia ili uweze kutumia tena matairi yaliyokwisha muda wake wa kutumika kwenye magari.

Unaweza kugeuza hayo matairi chakavu kwa  kutengenezea vitu mbalimbali kuanzia vyungu vya maua, fenicha na hata michezo ya watoto. Unaweza kuyatumia kama mapambo, kuyazungushia kwenye miti midogo ambapo mti unakua ukiwa umezungushiwa matairimawili au matatu,  pia kutengenezea bembea za kwenye miti.

Matairi chakavu yanaweza kutumika bustanini yakiwa pamoja kwa ajili ya kutengenezea vitanda cha maua au hata mbogamboga kama ni bustani ya mboga. Bustani hizi ndogo za matairi huwa zinahitaji maji kidogo. Unaweza kuyapaka rangi mbalimbali matairi haya na kutengeneza kazi ya sanaa yenye mvuto wa aina yake.

Ni rahisi sana kufanya hata mwenyewe bila msaada unachohitaji ni tairi chakavu, brashi na rangi kidogo tu.

Kwa kutumia matairi mawili chakavu yaliyoshikiliwa pamoja, kivuniko cha kioo au kamba kwa ajili ya kuziba/kufunika pale juu kwenye uwazi na vipande vya chuma kutengeneza miguu unaweza kutengeneza meza nzuri sana kwa ajili ya bustanini na hata ndani au kwenye varanda.

Kama una watoto wadogo au wajukuu nyumbani, unajua ni kiasi gani vifaa vya michezo ya nje ya nyumba vinavyoweza kuwa gharama kubwa. Badala ya kutumia hela nyingi kununua michezo unaweza kutumia matairi kadhaa na kuyapaka rangi (ambapo watoto huzipenda sana rangi hizi) na kuyafunga pamoja kwa bolti kwa ajili ya usalama ambapo unawatengenezea ngazi ya kuchezea na kupandia kwenye miti

Badala ya kuacha mpira wa kumwagilia bustanini ukiwa peupe bila kukunjwa huku ukichomwa na jua kila siku kiasi kwamba unakuwa mgumu na kukatika mapema, tumia tairi chakavu kwa ajili ya kuuhifadhi mle kwa kuuzungushia. Tairi hilo likipakwa rangi linakuwa na faida mbili ambazo ni pambo na matumizi.

Unaweza ukageuza matairi chakavu yasiyotumika tena kuwa mabembea. Watoto wako wadogo watayafurahia na utakuwa umewatengenezea michezo kwa gharama nafuu. Fundi anakufanyia kazi hii kwa kuongezea kamba au mnyororo kwenye tairi na kulining’iniza.

Namna nyingine ya kupendezesha kwa matairi chakavu ni kwa kuyapaka rangi mbalimbali na kuyatundika kwenye ukuta wa uzio. Vilevile tairi chakavu wakati likipendezesha bustani, linaweza kutumika pia kama eneo la mbwa kulala.