Jinsi ya kutumia rangi ya kijivu kupendezesha nyumba yako

Kwa wengi tumezoea kuona rangi ya kijivu ikiwa imepakwa kwenye maeneo kama kuta za viwandani, mahospitalini, shuleni na zile sehemu nyingi ambazo kuzipendezesha sio muhimu. Wengi hawafikirii kuwa rangi hii inaweza kupambwa nyumbani na ikavutia sana. Kijivu mara nyingi inaendana na mazingira na kuna njia nyingi unazoweza ukaitumia kupendezesha nyumba bila kuzidisha au kuigeuza kama eneo lililofifia. Vilevile kijivu

inafaa kupakwa ndani na nje ya nyumba.

Rangi ya kijivu ina jamii kadhaa ndani yake. Ikielekea kwenye uzito kwa mfano kijivu cha moshi wa taka zinazochomwa, inaweza kuchosha na pia inaweza kukaa kimuonekano wa maeneo ya biashara zaidi kuliko nyumbani. Fikiria chumba chenye kuta za rangi ya kijivu hiki, kinakuwa kama stoo au gereji ambapo mvuto sio kigezo mahali hapo.

Habari njema ni kwamba kuna jamii za rangi ya kijivu ambazo zinakuja kwa kasi na zina muonekano wa kuvutia mno. Kijivu chepesi ukutani kwa mfano, ni rangi ambayo haiwezi kupitwa na wakati. Ukitumia kijivu hii unaweza ukawa na kijivu kizito kwenye vitu vingine kama vile zulia au sofa ili kuleta mchanyato fulani mzuri kati ya hizi kijivu mbili.

Kijivu chepesi pia kinaendana na rangi nzito kama vile rangi za kahawia, njano ya dhahabu na damu ya mzee ambayo pia inaitwa burgundy. Rangi hizi zinashirikiana kwa uzuri sana na kijivu chepesi ambapo unaweza kuzitumia kwenye pazia na vitupio vya mapambo kama vile, mito, michoro ya ukutani na fremu za picha.

Baraka na laana ya kijivu ni kwamba inapendeza zaidi ikikaa kama background na pia ikionekana kwa wingi. Kwa hivyo kama kuna fenicha au kitu unataka kiwe kivutio cha chumba basi paka ukuta wako kijivu chepesi au kuwa na zulia la kijivu nzito. Yaani vile vitu vikubwa vikubwa vipe rangi ya kijivu, kwa mfano sofa za kijivu na kadhalika. Kijivu ni chepesi kutazama machoni na huwa hakina tabia ya ‘kufunika’ rangi nyingine. Kwa hivyo endapo una vitu unavyotaka viwe kivutio cha chumba basi paka kuta kijivu ili vionekane kirahisi.

Kwahivyo kama unataka kutumia kijivu lakini hutaki nyumba yako ionekane kama godown au chumba cha daktari basi tumia kile chepesi ukutani ukichanganya na vitupio vyenye rangi nzito kama nilivyoainisha hapo juu. Huku ukiambatanisha kijivu kizito kwenye vitu kama zulia.

Kwenye rangi za jamii ya kijivu unaweza kupata yoyote kuanzia nyepesi inayokaribia na nyeupe kabisa hadi nzito inayoelekea kwenye weusi.

Ukijipanga utagundua kuwa kijivu ni rangi yenye mvuto kwa kupendezesha nyumba yoyote ile. Kumbuka tu kuwa usizidishe na tumia pamoja na rangi nyingine pia.

Vivi anakuwezesha kupendezesha nyumba yako. Simu 0755 200023