Kwa chumba kisichotosha kuwa na kabati la nguo, fanya haya kuhifadhi nguo zako

Wengi walishayapitia au wanayapitia haya! Unapanga nyumba au chumba unakuta nafasi ni ndogo sana unaumiza kichwa kufikiria utahifadhije nguo zako maana ukiweka kitanda tu nafasi imeisha huna pa kuweka kabati la nguo.  Lakini maisha yanaendelea hayasimami na kwa maana hiyo  nguo pia lazima zihifadhiwe na kutolewa ili  zivaliwe.  Usife moyo! Kuna namna ya

kufanya sehemu yako hiyo ndogo iwe na mpangilio wa nguo zako na pakaonekana bomba kabisa.

Nimekukusanyia njia kadhaa za kuweza kuhifadhi nguo zako bila kabati kama ifuatavyo:

Tengenezesha stendi rahisi ambayo unaweza kutundikia nguo

Stendi ya nguo ni msaada wa ajabu unaoweza kuwa nao kwenye chumba chako cha kulala bila ya kuwa na kabati la nguo. Iwe ni ile ya kutundika nguo kwa kutumia henga au ni ya kutundikia moja kwa moja bila henga, stendi ni msaada mkubwa. Stendi inachukua eneo dogo sana la sakafu. Unaweza kuitumia kwa kutundikia, blauzi, makoti, majaketi, suruali, magauni, sketi na hata mabegi.

Si mbaya kutengenezea kishelfu eneo la chini. Hapa panakuwa ni mwake kwa ajili ya kutandaza viatu vyako na hivyo kutumia eneo la sakafu ambalo ungewekea viatu hivyo kwa shughuli nyingine. Na pia inaweza kuwa nzuri zaidi kama utaweza kuwa na stendi yenye ngazi zaidi ya moja ya shelfu. Hii yote itategemea na hitaji lako.

Ning’iniza bomba la kutundikia nguo

Kuning’iniza bomba la kutundikia  nguo kunaweza kukushangaza lakini linafaa sana kama chumba ni kidogo sana kiasi kwamba hata kuweka stendi unaona kama unamaliza nafasi. Unapohamia kwenye chumba au nyumba ndogo inakupasa kuchanganya akili kadri uwezevyo kwa kutumia kila mbinu kuhakikisha kuwa vitu vyako vyote vinakaa vizuri bila kuonyesha hali ya kurundikana na huku ukibakiwa na nafasi ya kutosha. Ni rahisi, fundi anakuning’inizia kamba mbili imara toka kwenye dari na kuzitumia kushikilia hilo pomba la kutundikia. Zaidi ya kutundikia nguo zako na kuhifadhi eneo la sakafuni, muonekano wake pia ni kivutio. Zingatia hizo kamba za kuning’iniza ziwe imara kwani fimbo itakapowekwa nguo uzito utaongezeka sana. Hakuna kitu kinachoshtua kama usiku unaposikia kitu kimenguka kwa nguvu ndani ya chumba ulicholala.

Funga mashelfu ukutani

Bila shaka ulishawahi kuona mfanyibiashara anapohamia kwenye fremu mpya jinsi anavyoweka mashelfu. Kwa mtindo huu huu kama una chumba ambacho hakitoshi kuweka kabati la nguo unaweza kuchagua eneo la ukuta na ukafunga mashelfu kwa ajili ya kuhifadhia nguo zako. Yanaweza kuwa ya gharama nafuu kabisa hata kama yanatokana na matenga ya nyanya!  Cha muhimu ni kwamba yatakupa eneo salama na safi la kuhifadhia nguo zilizokunjwa, viatu, vitabu, pochi na vingine vingi ambavyo moyo wako unatamani. Unaweza ukayapamba kwa kuyapaka rangi mbaimbali au hata kwa rangi moja.

Kuwa na ubao mrefu wa kitanda

Unapokuwa na kitanda chenye ubao mrefu wa kichwani, unaweza kuchimbia kulabu nyuma ya ubao huo ambapo utazitumia kutundika nguo ambazo utazivaa kwa wiki nzima. Zile za ziada hifadhi kwenye masanduku na yaweke mvunguni mwa kitanda lengo likiwa ni lilelile la matumizi mazuri ya nafasi. Itakapofika mwisho wa wiki, unachagua tena nguo nyingine kwa wiki inayofuata. Kiukweli eneo la nyuma ya ubao wa kitanda huwa linakaa tu bila kazi ambapo linaweza kutumika vizuri tu.

Kwa wewe uliyekuwa na changamoto ya namna hii bila shaka umefaidika na elimu hii. Zaidi kwa ushauri wa namna ya kuweka mpangilio nyumbani kwako tuwasiliane 0755 200023