...nothing happier than to watch them growing...

ideas za makabati ya bafuni

Kila mmoja wetu ana ladha na mahitaji mbalimbali tofauti na mwingine. Wakati baadhi yetu tukiamini kuwa muonekano wa sebule ndio kipaumbele namba moja kwenye makazi yetu, wengine wanajali zaidi ni kwa namna gani mabafu yao yanaonekana, kwahivyo makabati ya bafuni kwa watu hawa ni kitu muhimu zaidi kwao  kwa uzuri na kwa matumizi ya bafu.

Wenye nyumba wengi wanaona uhaba wa eneo la kuhifadhi vitu bafuni kama vile shampoo na vipodozi. Sasa basi yawezekana ulikumbuka hivi wakati wa ujenzi na hivyo kuwa na mababati yaliyojengewa humo humo. Vinginevyo yapo hata ya kusimama peke yake, kama makabati ya bafuni ni jambo muhimu kwako bado hujachelewa, pata mionekano ya makabati haya ambapo staili mojawapo yaweza kukuvutia.

....my babies....

ulishahudhuria msiba ambapo marehemu ana miaka 80 lakini ukashangaa jinsi wanae wanavyomwaga chozi...kumbuka usemi wa kiswahili kuwa mtoto kwa mama hakui...lol

my article for newspaper: ubora wa tile za bafuni

Umuhimu wa kujali ubora wakati wa kununua marumaru za bafuni

Bila shaka kila mmoja anataka apate bidhaa au huduma kwa thamani ya hela aliyotoa wakati wa ujenzi wa nyumba yake, lakini chaguo la marumaru za bafuni inahitaji kuwa makini zaidi ya hilo. Katika makala hii nitakuwa na Mhandisi David ambaye atatujuza umuhimu wa kuzingatia ubora zaidi ya gharama wakati wa kununua marumaru za bafuni.

Unaweza kuwa umepata marumaru za bei nafuu, lakini zisizokuwa na kiwango. Marumaru za aina hii zitakugharimu kwa kiasi kikubwa muda wote utakaokuwa unaishi kwenye nyumba yako hiyo.

Linapokuja swala la marumaru za bafuni, malighafi, rangi, uimara, mtelezo, na usimikaji ni mambo muhimu zaidi ya kuzingatia, anasema David. Hakikisha kuwa unapata ushauri kwa fundi mwenye uwezo kabla ya kufikia kufanya uamuzi.

Marumaru za bafuni zipo za kuanzia maumbo madogo zenye nyongeza ya border za aina na michoro mbalimbali. Wajenzi wanatafuta marumaru za maumbo tofauti tofauti  kutoka umbo la pembe nne lililozoeleka hadi malighafi nyingine kama mawe ya asili na vioo. Wanapenda pia mabafu yao yawe na muonekano wa  kazi za sanaa zaidi, anasema David. Ila marumaru za bafuni zinafanya kazi kubwa, zinatakiwa kufanya mvuke usisambae vyumba vingine na kulinda kuta zisiharibiwe na ukungu na hali ya umajimaji. Zinatakiwa zizibwe vyema na grout maeneo ya miungio na ziwe na usalama kutembea juu yake zinapowkuwa zimeloa, anasema mhandishi.

Pamoja na mawe ya asili, marumaru bado zitabaki kuwa chaguo maarufu zaidi kwa ajili ya kuta na sakafu za bafuni. Marumaru ngumu zina rangi sawa kwenye unene wake wote, ingawa zina gharama zaidi, na hapa ndipo mnunuzi anapopaswa kuwa makini. Ujue kutofautisha kama unanunua marumaru zilizopakwa rangi kwa juu tu, na hizi ni zile nyepesi na bei yake iko chini. Aina hii ni kuwa baada ya muda si mrefu rangi inatoka kutokana na kukanyagwa mara kwa mara, kwa kuwa rangi imepakwa kwenye eneo la juu la marumaru kwa unene kiasi tu na sio unene wote. Hizi zilizopakwa rangi inakuwa eneo la juu tu mfano barafu kwenye mlima au kwenye keki! Hizi za aina hii zinafaa zaidi kwa mapambo pengine kutengenezea ua la ukutani lakini sio kwa kuhimili shurba za sakafu ya bafuni. Marumaru  ambazo zina rangi hiyo hiyo hadi ndani kwenye kiini na unene wote wa marumaru ni imara zaidi kwa matumizi ya sakafu ya bafuni.

Kwa hivyo muhimu zaidi ni kutumia marumaru hizi ngumu zenye rangi sawa kila mahali kwa ajili ya sakafu na kuchagua za bei rahisi zinazoendana na zile ngumu kwa ajili ya ukuta, anasema David. Usimikaji wa marumaru ni kazi ya sanaa kwahivyo inahitaji fundi mwenye uwezo nayo.

Zaidi ya kuweka marumaru bafuni unaweza kuweka pia jiwe la asili kama vile marble lakini iliyo ngumu. Ubora wa jiwe na usimikaji wake ni muhimu sana. Uwekaji wa jiwe la asili ni wa kitaalam. Kunaweza kuwa na shida ya kufitisha slabu kubwa ya jiwe hilo kwenye maeneo ya kutolea maji machafu na kuingiza maji safi,  na muhimu zaidi ya yote sio kila jiwe la asili linafaa kwenye mazingira ya mvuke na majimaji ya bafuni, anasema mhandisi. Mawe mengine ya asili yananyonya maji na mwishowe kuwa na mipasuko.

Marumaru zitaongeza thamaini ya nyumba yako, kwahivyo kuwa tayari kutumia muda na pesa. Kwa bafu la kisasa na muonekno wa kifahari chagua marumaru zenye rangi za mwanga kama vile nyeupe ukutani huku ukiweka miisho na mpangilio fulani  wenye mvuto kwa baadhi ya maeneo ya ukuta.

Haijalishi ni mtindo gani wa marumaru utakaochagua kwa ajili ya bafu lako, zingatia ubora na usimikaji wa kitaalam kabla ya kufanya maamuzi yoyote. Dondoo muhimu kuliko zote, kabla hujaanza kutengeneza bafu lako angalia thamani ya nyumba yako. Ubora wa bafu uendane na thamani ya nyumba. Kwa kuzingatia hilo utafanya uamuzi sahihi kwa kushirikisha wataalam watakaokufanya usijutie maamuzi yako hapo baadaye.

Makala hii imeandaliwa na Vivi Machange ambaye ana mapenzi makubwa juu ya muonekano wa makazi na pia ni mjasiriamali wa usafi wa magari, mazulia na nguo. Kwa maoni au maswali tuma kwenda 0755 200023 au christines.daughter@yahoo.com

my article for newspaper: jinsi ya kupamba bedroom

Jinsi ya kupamba chumba cha kulala

Kwa nyumba nyingi chumba cha kulala ni chumba binafsi zaidi. Ni chumba pia ambacho kina vitu vingi zaidi binafsi. Kinaweza kuwa kama kiota cha mahaba au mahali patakatifu pa kulala na kupumzika. Pia kinaweza kuwa chumba cha kuchangamka na kutuliza kwa watoto, kwa jinsi wanavyokuwa wakigundua kuwa wanamiliki chumba chao wenyewe.

Kupenda kufurahisha marafiki, majirani na wageni; wenye nyumba wengi wanamalizia nguvu zao kupamba vile vyumba vya kuonekana na hadhara ndani ya nyumba. Umefika wakati wa kuwa mchoyo na kuelekeza nguvu zako kwenye chumba cha kulala. Juu ya yote ni kuwa kabla ya kuoga kujiaandaa kutoka ni lazima kwanza utokee kitandani.

Kwanza kabisa anza na kitanda kwa ajii kitovu cha chumba chochote cha kulala ni kitanda. Ni wazi kuwa kitu cha kwanza cha kuzingatia kwenye kitanda itakuwa ni godoro, lakini usisahau ubao wa kichwani. Ni ngumu kudharau umuhimu wa sababu za kisaikolojia katika kupata usingizi mwororo. Hisia na hata muonekano wa kitanda chako wakati unapoingia humo inaweza kuelezea ni namna gani unavyojisikia wakati unapotoka humo.

Kwa upande wa sakafu chaguo zuri zaidi kwa ajili ya chumba cha kulala ni zulia na mara zote imekuwa hivyo. Hamna kitu kizuri kama kuamka na kuweka miguu yako kwenye sakafu ambayo inaelekea kuwa na hisia kama za kitandani kwa kupata joto lile lile mithili ya la kitandani. Wengine hupenda kuweka sakafu za marumaru na mbao lakini eneo la pembeni mwa kitanda wengi wanapenda kuweka zulia.

Wazo la mwanga katika chumba cha kulala kwa baadhi linadharauliwa. Taa zisizokuwa na maridadi na balbu za juu ya kichwa tu zimeanza kupoteza mvuto kwenye chumba cha kulala cha kisasa. Taa za vivuli za kuweka juu ya vimeza vya kando mwa kitanda na za ukutani za maridadi ndio zinaendana na wakati kwa chumba cha kulala, kwa ajili ya mwanga wa chumba hiki kwa matumizi ya wakati wowote iwe ni mchana, jioni au usiku. Taa ndogo zinaweza kuwekwa kwa ajili ya kutumia muda maalum ambapo hutaki kuwasha taa zote kwa mfano wakati wa kusoma au kushikisha kifungo.

Kwa vyumba vidogo vya kulala mara nyingi vinafaidika na uwepo na makabati ya nguo, madroo na shelfu kwa kusaidia kuhifadhi na kuweka mpangilio. Baadhi ya vitu vidogo dogo na nguo vinapoukuwa vimewekwa kwenye sehemu hizi za kuhifadhia, chumba kinaonekana nadhifu.

Mara nyingi rangi za mwanga  zinashauriwa zaidi kwenye chumba cha kulala kwa ajili zinaleta hisia ya mapumziko. Rangi za vitambaa vya malazi viendane na rangi nyingine hapo chumbani na hata zile za samani. Shuka za rangi na maua ya kuvutia zinunuliwe ili kuongeza uzuri wa chumba.

Komfota lenye rangi nzito litaendana na samani au ubao wa kichwani wa mbao. Hii pia ni kweli kwa mapazia.

Wakati huo huo kumbuka kuweka samani zenye ukubwa na wingi wa kuendana na ukubwa wa chumba. Kabla hujanunua samani hizo ni vyema kwanza kufahamu mpangilio wa sakafu na ukubwa uliopo.

Kutengeneza bajeti ni muhimu kwa mradi wowote wa maboresho ya nyumbani. Kujipa wastani wa gharama inayohitajika itakusaidia kuamua ni nini kinachoweza kufanyika na kipi si kipaumbele. Baadhi ya shughuli kwenye mradi huu unaweza kufanya mwenyewe, kwa baadhi itakubidi utafute mtaalam. Kama kipaumbele chako ni ukuta kwa mfano, basi unaweza kutafuta mtalam wa rangi akapaka, ilihali ukitandika zulia mwenyewe. Vyovyote utakavyoamua, ni wakati wa kufanya chumba chako kuwa chako tena.

Kupamba chumba cha kulala ni shughuli mojawapo ya maboresho ya nyumbani ambayo inaweza kuhuisha tena afya yako na mahali unapoishi.

Makala hii imeandaliwa na Vivi Machange ambaye ana mapenzi makubwa juu ya muonekano wa makazi na pia ni mjasiriamali wa usafi wa magari, mazulia na nguo. Kwa maoni au maswali tuma kwenda 0755 200023 au christines.daughter@yahoo.com

...picha hizi za mapambo haya yamenitumbuiza...

Hii picha nimefurahishwa zaidi na jinsi ya kupamba kwa mto ya soseji. Angalia hilo sofa kati kaweka soseji na iliyokuwa sandwiched na square, so nice...

Hii fremu unaweza iweka jikoni hasa kama mlango wako wa jikoni ni wa kuingilia toka nje pia. Ni pambo na ukaribisho vilevile

 haya tena ni ubunifu tu

lovely

Kama unakaa nyumba ya ghorofa ona hapa chini ya ngazi unavyoweza kufanya mambo.

designs simple za majiko kwa wanaoanza familia

Kuna aina nyingi za majiko ambazo wewe mdada unayeanza familia unaweza kuchagua kulifanya jiko lako kuwa na mashiko na kufanya kazi iliyokusudiwa kwenye nyumba. Siku hizi imekuwa rahisi kupata mawazo kwa kuchungulia dondoo mbalimbali kwenye majarida, kudesa la jirani au rafiki, kuangalia video na mitandao mbalimbali kwa mfano unavyosoma hapa sasa.

Muonekano wa jiko kwa asilimia kubwa unachukuliwa na tile na makabati. Tile za floor na ukuta wa jiko, zipo za kumwaga, ni wewe tu kuamua rangi na muundo upi unataka na kwa finishing ipi. 

Kitu kingine  unatakiwa kuzingatia kwenye design ya jiko ni makabati. Hard wood eg mkongo, mninga ndio mambo yote na ni muhimu sana, usidanganyike kwa urembo wa soft wood kwani si lolote si chochote kwa jikoni. Jiko litolee gharama lidumu.

 hili kwa nyumba yako ya room 3 safi sana

 rangi za makabati nazo ni decoration

 tile za floo nimezipenda, na kuwa na kisehemu cha kulia kama nafasi inaruhusu si mbaya

 rangi zimenibamba ila tile za floor big nooo

thanks God it's friday...mchakamchaka una slow down

my article for newspaper: vioo vya mapambo

Boresha muonekano wa ndani ya nyumba kwa kuweka vioo vya mapambo.

Vioo vina kitu kwakweli ambacho ni maalum ndani yake. Vinakusaidia kukujulisha unaonekanaje na pia kukuwezesha kujiweka jinsi ambayo unataka uonekane. Zaidi ya haya maandalizi binafsi na kujiridhisha na muonekano wako kabla hujatoka, vioo vinasaidia pia kwenye kupamba ndani na hivyo kufanya muonekano wa nyumba kuwa maridadi na nadhifu zaidi kwa kila mgeni anayekutembelea.

Kama kuna pambo la ndani ambalo wenye nyumba hatakiwi kulikosa, basi ni kioo. Havitumiki tu kujiangalia unapoingia, bali vina mahadhi yake kwenye kuongeza staili ya chumba au muonekano wa kupagawisha kwa kumfanya mgeni kuduwaa. Sababu nyingine kuu hapa ni kuwa vioo vinaweza kuwa  na bajeti rafiki. Ni kweli kuwa kuna vioo ambavyo ni lazima viwepo nyumbani kwa matumizi kuwa watu wanahitaji ili kuhakikisha kuwa wanaonekana jinsi wanavyotaka kuonekana, lakini leo kwenye makala hii tunaongelea vioo kama mapambo ambavyo unaweka kwenye ukuta wa nyumba yako ili kuongeza staili na ukubwa.

Utagundua kuwa leo, sokoni kuna aina nyingi na tofauti za miundo na aina za vioo. Watengenezeaji wa vioo vya mapambo wanakuja juu kwa kuongeza ubunifu hasa wa fremu wanazofungia vioo hivi. Unaweza kuvipata vioo hivi vikiwa kwenye fremu ya kila malighafi unayohitaji kwa mandhari unaotaka kutengeneza.

Fremu nayo ni kigezo muhimu cha kioo kuwa kifaa cha mapambo. Unaweza kuagiza kioo kwa umbo unalotaka kwa mfano unaweza kuwa na kioo kwenye ukuta wa sebule ambacho kinatoa sura kwenye taswira nne kwa jinsi ambayo ukijitazama unaona uso nne zinazofanana.. Haijalishi staili unayotaka au bajeti uliyonayo, kuna uhakika wa kupata kioo ambacho ni sahihi kwa mradi wako.

Sababu ya kuweka vioo hivi ndani ya nyumba ni ukweli rahisi kuwa unataka kutumia ile hali ya kujiona ndani ya kioo kwa faida ya kimapambo. Baadhi wananunua vioo na kuvitundika kama sanaa nyingine za ukutani, kwa maana ya kuwa wanakitundika katikati ya picha na fremu nyingine, au wanakiweka kwenye ukuta ambao hauna kitu kingine ambacho kingefaa hapo. Hata hivyo unaweza kutumia vioo vya mapambo kuakisi mwanga na vifaa. Kwa mfano unaweza kuwa na ujia (corridor) ambao una mlango upande mmoja lakini mwingine hauna. Pambo lako hapo linaweza kuwa mmea wa kijani (uwe hai au mfu) pale kwenye ukuta usiokuwa na mlango pamoja na kioo. Kioo kitauakisi ujia kwa kuukuza uonekane mpana na mrefu. Kupamba kwa vioo kunafanya eneo dogo lionekane kubwa na mbinu hii inatumika na wataalam wengi wa ubunifu wa ndani nyumba.

Kupamba kwa vioo kunaongeza mwanga wa chumba. Chumba kilichopakwa rangi ya giza kinaweza kuonekana kidogo, kuongeza vioo kwenye kuta zake kutaboresha mwanga. Njia sahihi zaidi ya kuongeza mwanga wa jua bila kuongeza taa ni kufunga vioo vitazamane na madirisha. Vioo vinadaka mwanga wa jua toka dirishani na kuusambaza chumba kizima. Hii inaweza kuwa njia mojawapo pia ya kubana matumizi badala ya kuwasha taa mchana.

Kupamba kwa vioo vya mapambo hakuhitaji mtaalam. Mtu akiwa na vifaa vya toolbox anaweza kufunga vioo ukutani  na kutengeneza chumba chenye muonekano mzuri kwa gharama nafuu.

Chagua vioo vyenye maumbo ya kuvutia, pembe nne ni nzuri ila vioo vyenye maumbo yasiyozoeleka vinafanya umaridadi zaidi. Tafiti aina na maumbo mbalimbali ya vioo kabla hujamua ni vipi unataka.

Ili kukifanya chumba kisicho na uwiano kionekane kuwa nao, funga vioo vya mapambo ukutani. Vioo hivi viwekwe kuakisi vitu fulani kwenye chumba ili kufanya ionekane kama vitu hivi viko katika kila upande wa chumba, kwahivyo pale unapoingia uone kama chumba kina uwiano na ni kikubwa.

Baadhi ya wenye nyumba wanatamani waboreshe muonekano wa ndani wa nyumba zao. Marekebisho yana gharama kubwa, hata hivyo wewe mwenye nyumba usizime tamanio lako. Unaweza kunyanyua uso wa ndani ya nyumba yako kwa kutumia vioo vya mapambo badala ya marekebisho makubwa.. Mradi huu mdogo wa kunyanyua uso kwa kutumia vioo unaweza kukupa matokeo usiyotarajia. Kupamba kwa vioo ni moja kati ya njia nyepesi na rahisi za kuboresha muonekano wa ndani ya nyumba.

Makala hii imeandaliwa na Vivi Machange ambaye ni mjasiriamali  upande wa usafi wa nguo, mazulia na magari; pia ana mapenzi makubwa ya muonekano wa nyumba. Kwa maoni au maswali tuma kwenda 0755 200023 au christines.daughter@yahoo.com

tv cabinet ni moja kati ya post zangu iliyopendwa kuliko...

nakuongezea hapa dondoo chache za muhimu kabla hujanunua kabati la tv, twende kazi...

kabati hili ni moja kati ya fenicha ya msingi hapo sebuleni ambapo unakutana na marafiki zako, kula dinner na kuangalia tv. Wakati unapotaka kununua kabati la tv, ukubwa wa tv yako unahusu.

wakati wa kununua usifikirie tv tu. fikiria pia vitu vidogodogo ambavyo vinatakiwa kuwa hapo lakini vihifadhiwe, kwa mfano remote, kwahivyo nunua kabati lenye droo moja au mbili na hata likiwa pia na shelfu itakuwa poa zaidi.. kwahivyo kumbuka kuwa usifikirie tv tu.

la mwisho lakini si dogo unatakiwa uamue malighafi na rangi za kabati lako. kuna makabati mengi ambayo machoni yanavutia lakini kwa ubora si lolote si chochote. kwa swala la rangi hakikisha una research hadi uone kitu kinachokuvutia ndio ununue. Good luck!

super saturday na marafiki zangu wa ukweli...

hapa na pale leo na watu wangu wadogo...

 pozi la kibaunsa..sungusungu wangu

 pozi zikazidi hadi rafiki akalamba chini

akanyanyuka akijongea tartiiibu

njia rahisi kabisa ya kupamba sebule

kwa vile sebule ni sehemu muhimu ndani ya nyumba inahitaji kutupiwa jicho zaidi ya nyingine zote na ni lazima ipambwe kwa njia mbalimbali ili iwe na mvuto mbele ya kila mgeni anayekutembelea, na hii wala si ngumu.

kwanza kabisa weka fenicha zenye mvuto ambazo ni sofa, vimeza vya kando, kimeza cha kati, meza ya chakula na viti vyake.

weka taa maridadi na zenye mwanga wa kutosha kumulika sebule yote. weka taa za vivuli juu ya meza na sakafuni ili kuleta matokeo makubwa. kama wewe ni mshabiki wa wallpaper chagua ukuta wa tv ubandike, ning'iniza picha na fremu ukutani na hata vikapu vidogodogo vikiwa na maua ya kutengeneza.

weka vyungu vikubwa vya maua juu ya meza au sakafuni kwenye kona. weka kioo kikubwa katika ukuta wowote na upambe boda zake kwa fremu za kuvutia. unaweza pia kuweka sanamu kwenye kona na pembe za sebule yako.

mwisho kabisa usisahau kuweka pazia na fimbo za kuvutia.

my article for newspaper: fenicha za kwenye bustani na varanda

Zingatia haya kabla ya kununua fenicha za nje ya nyumba

Fenicha za nje ya nyumba pia zinajulikana kama fenicha za kwenye bustani au varanda.  Aina hii ya fenicha huwa imetengenezwa kwa malighafi inayozuia maji kupenya, kwa kuwa ni kwa ajili ya matumizi ya nje. Fenicha za  nje ya nyumba zimekuwa zikitumika toka enzi za himaya ya Roma.

Fenicha za nje ya nyumba  ni muhimu kwa mikutano wakati unapokuwa na kikundi cha watu kwa ajili ya siku maalum kama vile siku ya kuzaliwa na kadhalika. Hakuna kinachofurahisha zaidi kama kuwa na kiusingizi kwenye upepo mwanana wa kwenye varanda au bustani. Kuwa na chakula cha usiku na mwenzi wako wakati nyota ziking’aa angani inakuwa ni mahaba zaidi ya ndani ya nyumba.

Ila kuna jambo linalofanya aina hii ya fenicha kuwa tofauti na zile za ndani; malighafi ya fenicha za nje ya nyumba ni lazima iwe imara kwa sababu fenicha zitapambana na mvua kubwa, jua kali, upepo na baridi kali. Je hali ya hewa ya unapoishi ni joto na ukame, au unaishi karibia na pwani? Mvua ni za mara kwa mara? Haya yote ni maswali muhimu ya kupatikana majibu kabla ya kununua fenicha za nje ya nyumba. Hapa ni sababu, hali ya joto na ukame inafanya mbao kupasuka. Upepo mkali unaweza kufanya fenicha za aluminiam zipeperushwe.

Ndio maana ni muhimu sana kuhakikisha kuwa fenicha unazotumia kwenye mazingira ya nje ya nyumba ni sahihi kwa matumizi hayo.

Kwa malighafi, fenicha nyingi za kutumia nje ya nyumba zimetengenezwa kwa plastiki, mbao aluminiam na chuma cha pua. Amua ni malighafi ya aina gani unataka kwa ajili ya fenicha zako za nje. Vitu vitatu ambavyo vitakusaidia kuamua ni hali ya hewa, utunzaji na muonekano. Baadhi ya malighafi kama vile aluminiam hazihitaji utunzaji wa kina. Chuma cha pua kinaweza kudumu kwa muda mrefu sana na kinamudu joto na unyevu. Hapa ni muhimu kufahamu kuwa fenicha za nje za mbao sio imara kama nyingine, kwa hivyo inatakiwa kuziweka dawa mara kwa mara, anasema mseremala Rajab Hamis.Bottom of Form

Fenicha za nje ya nyumba zinakusaidia kuongeza ukubwa wa makazi yako, unapata eneo zaidi la kupumzika hasa wakati ule ambao jua sio kali sana au mvua sio nyingi. Kwa hivyo fenicha hizi zinakamilisha ahadi ya mapumziko, burudani na raha kwa ujumla. Uchaguzi wa fenicha za nje unazingatia hatua zilezile za kununua fenicha za ndani. Japo kunahitajika umakini wa ziada kwa ajili ya tofauti  kati ya fenicha hizi mbili.

Fikiria ni eneo kiasi gani ulilonalo na lina umbo la namna gani. Je ni varanda ndefu na nyembamba au ni fupi pana? Tumia eneo na umbo la varanda au bustani yako kufahamu ukubwa wa fenicha zako za nje. Hakikisha unaacha nafasi ya kutosha kati ya fenicha zako ili uweze kupishana kirahisi. Tumia utaratibu ule ule wa kupanga fenicha za ndani. Kwa eneo dogo meza za ukubwa wa kwenye mgahawa na stuli zitafaa zaidi kwani zitachukua nafasi ndogo.

Ni wapi utakapoweka fenicha zako za nje, je kwenye bustani yako kuna eneo la kukaa ambalo lina paa? Na pia je fenicha zako zitakaa juu ya sakafu laini ya udongo na majani au zitakaa juu ya sakafu ngumu? Hii itakusaidia kuchagua malighafi ambayo itaoana na mazingira yako.

Hakikisha kuwa ukikalia fenicha zako unapumzika vyema. Hata kama viti haviji na mito unaweza kutengenezesha mito yako mwenyewe na uwe unaihifadhi ndani majira ambayo hutumii fenicha za nje. Jaribu fenicha za nje kabla ya kununua na hata kuzilaza kwa jinsi ambayo ungetaka viwe kama vitanda vya mchana.

Yote hayo yakiwa yameshasemwa bajeti yako ndio itaamua ni nini unachoweza kununua. Siwezi nikasisitiza ni kwa namna gani ni muhimu kununua fenicha imara zaidi unazoweza kumudu. Kama uchumi unagomba, bado kuna namna unayoweza kupata fenicha za nje zilizo imara kwa hela uliyonayo. Unaweza kupata fenicha za nje nzuri na imara kwa bei nafuu kabisa kwa kununua zile zilizotumika. Fenicha zinazouzwa kwenye minada ya wafanyakazi wa kimataifa wanaomaliza muda wao na hivyo kurejea kwao, ukizifanyia maboresho kidogo na kuzisafisha zinaonekana kama mpya, na huwa hizi zinakuwa na ubora unaokubalika. Unaweza pia kufikiria kubadilisha mito na makusheni kwa ajili ya kuhuisha fenicha za nje za zamani.

Makala hii imeandaliwa na Vivi Machange ambaye ni mjasiriamali  upande wa usafi wa nguo, mazulia na magari; pia ana mapenzi makubwa ya muonekano wa nyumba. Kwa maoni au maswali tuma kwenda 0755 200023 au christines.daughter@yahoo.com

My article for newspaper: Kupamba ndani nafuu na haraka

Njia za gharama nafuu na haraka za kubadilisha muonekano wa ndani ya nyumba yako.

Watu wengi wanafikiria kuwa kupamba ndani ya nyumba ni jambo kubwa na ambalo linahitaji hela nyingi. Lakini hii sio kweli, mtu anaweza kutafiti njia za kupamba nyumba kwenye mitandao au majarida ya mapambo ya nyumbani  na kuona ni njia zipi zinazoweza kumfaa kwa gharama aliyo nayo. Makala hii ni mojawapo ya vyanzo vitakavyokupa mawazo ya njia rahisi na za haraka zaidi za kupamba ndani ya nyumba yako kwa namna maridadi kabisa.

Kabati la mapambo ni njia mojawapo ya gharama nafuu na ya haraka ya kupamba ndani ya nyumba. Kabati hili unaweza kulitengenezersha kwa fundi kwa mtindo unaotaka wewe mwenyewe iwe ni kwa sehemu kubwa kuwa ni kioo kitupu au mchanganyiko wa mbao nusu na kioo nusu. Linaweza kuwekwa sehemu ya kona ya chumba.

Linapokuja swala la mapambo ya kabati la mapambo, eneo la ndani ndio la kujali zaidi. Pamoja na mtindo wa kabati husika vioo pamoja na taa ya ndani ya kabati vinamaliza kila kitu! Mapambo ya aina mbalimbali huwekwa ndani ya kabati hili na kuleta muonekano wa kuvutia. Na pia wengine hupendelea kuweka glass za kifahari za mvinyo za aina ya crystal na hii inalipendezesha mno kabati kwa kweli. Tunu sio kitu ambacho umenunua karibuni kwa hela nyingi. Ni kitu ambacho kina thamani kwako zaidi ya pesa inavyoweza kununua. Inaweza kuwa ni sanaa uliyopewa toka kwa bibi na imepitia vizazi kadha wa kadha hadi kukufikia wewe au inawezekana ni kitu kilichokuwa sehemu ya maisha yako ya utotoni au kitu maalum ulichopewa na mtu maalum. Ukizungusha macho yako kukitazama kinakupa burudiko la nafsi.

Ndani ya kabati la mapambo waweza weka pia mdoli wako ambao unadhani ni wa kipekee na unafaa kuwepo hapo. Pia waweza weka vitu mbalimbali kutoka sehemu tofauti za dunia. Zingatia kua huna haja ya kusongamani kila sanaa uliyonayo kwenye kabati lako la mapambo. Hakikisha unaacha nafasi kati ya kitu na kitu ili isilete muonekano wa mrundikano. Chochote ambacho unadhani kitafanya kabati lako lipendeze waweza weka humo.

Njia nyingine ya kupamba ndani kwa gharama nafuu na kwa haraka ni kwa kutumia maua ya kutenengeneza (maua mfu). Maua na mimea inafanya muonekano wa mahali uwe wa kuvutia. Mtu anaweza kuweka mimea na maua kadhaa ya kutengeneza katika sehemu tofauti tofauti za nyumba yake. Staili na rangi ya maua na mimea hii iendane na rangi ya chumba cha nyumba. Maua hayo yanaweza kuwekwa sakafuni au juu ya meza vilevile.

Mtu anaweza kutumia vibebeo vya mishumaa kupambia nyumba yake na ikaonekana maridadi. Unaweza kutafuta aina mbalimbali ya vibebeo hivi kwenye maduka ya mapambo ya ndani na unaweza kuchagua vya mbao au vya kioo.

Mito ni njia nyingine ya kupamba kwa gharama nafuu na kwa haraka. Unajisikia burudani ukiwa na mito ya staili na maumbo mbalimbali. Unaweza kutupia mito kadhaa ya  mapambo kwenye seti zako za sofa ambapo zitaleta matokeo makubwa na itakuwa vyema zaidi kama ukitumia mito ya rangi nyekundu na ya chungwa.

Badilisha muonekano wa madirisha kwa kubadilisha pazia na fimbo. Hii sio usumbufu kama ambavyo unaweza kufikiri kwani kuna maduka mengi yanayouza pazia ambazo zimeshonwa tayari. Na kwa swala la fimbo zake kwa ajili tayari kuna vishikizo vilivyotobolewa,  ni kiasi tu cha kuondoa fimbo ya mtindo mmoja na kupachika nyingine ya mtindo tofauti bila ya kutoboa ukuta tena.

Hizo ni njia za gharama nafuu na haraka zaidi za kupamba nyumba yako. Jaribu mojawapo na utarudi kunishukuru. 

Makala hii imeandaliwa na Vivi Machange ambaye ni mjasiriamali  upande wa usafi wa nguo, mazulia na magari; pia ana mapenzi makubwa ya muonekano wa nyumba. Kwa maoni au maswali tuma kwenda 0755 200023 au christines.daughter@yahoo.com

...the Big Man is taking care of us...

yani huu mchakamchaka unanifanya nashindwa hata kuwa na muda wa ku post. napata ukakasi nikiona watu 100 hadi 200 wamenitembelea lakini sijaweka post mpya, najua kuwa siwezi kuwa na close friends 100 na kuendelea hivyo wote hawa ni watu wangu ambao mngependa kuona na kusoma chochote toka kwangu...hata hivyo msijali wapendwa..soon nitafanya mambo..echuuuuuuuu...

---vitu vizuri---Je, unatumia hii unaponyoosha nguo zako?

spray starch inakuwezesha kunyoosha nguo zako kirahisi zaidi, kwani inaondoa mikunjo iliyokomaa, inafanya nguo zisitepete, inazipa harufu nzuri na kuzifanya zionekane mpya kila wakati. Utakapoanza kuitumia kumbuka kurudi kunishukuru...auchiiiii

...my gifts from the Big Man...

...tumeshakula dinner, tumeshavaa pajama...tunamshukuru Mungu atupe usingizi mwororo...

my article for newspaper: umuhimu wa kuondoa mrundikano

Majira haya ya kipupwe upepo ni mwingi na kazi ya usafi inaongezeka kwa ajili takataka nyingi kwa mfano majani makavu na vumbi zinapeperuswa kila mahali na wengi wanaofanya usafi hasa wa nje ya nyumba wanalalamika kuwa mazingira yanachafuka muda mchache tu baada ya kusafisha. Wengi wetu wanaliona hili na huku jua likiwa kali. Haijalishi unajali mazingira kiasi gani bali kuwa eneo ambalo limesafishwa vizuri kunakupa hisia za ukaribisho na kuhuisha nafsi na ni muonekano chanya kwako. Kuwa mazingira safi kunaongeza nguvu chanya kwenye mwili na mazingira yako. Ukiweza kudumisha usafi kwa kipupwe hiki basi utakuwa umeweza kutengeneza nguvu hii.

Lengo ni kuishi burudani na mazingira yako, ili nguvu iliyopo kwenye mazingira hayo ifanye kazi upande wako kuliko kinyume chako. Kwa jinsi tunavyoguswa na mazingira yetu ndivyo pia tunavyoakisi maeneo haya.Wengi wetu tulishaingia ndani ya jengo au chumba na mara hiyohiyo tukajihisi kuchefukwa. Kinyume na hapo, vilevile wengi tulishaingia maeneo na kutufanya kujisikia burudiko na utulivu wa nafsi. Kuwa katika eneo safi na tulivu kunaleta uwiano na starehe ndani ya mazingira hayo.

Katika mazirngira kitu nambari moja kinachozuia utengenezwaji wa nguvu chanya ni mrundikano. Mrundikano unaweza kutufanya kujisikia kuelemewa, msongo, kuchanganyikiwa na kukwama. Mrundikano ni pamoja na kitu chochote ambacho hakipendwi tena au hakitumiki, hakiko kwenye mpangilio, vitu vingi mno kwenye eneo dogo, ujazo na ujazo, miradi ambayo haijakamilika, kila kitu kilichopo kwenye hali ya kuvugu na/au kila kitu kichafu.

Tembea kuzunguka nyumba yako – nje na ndani. Fungua milango ya makabati, angalia kila mahali. Je una mlima wa makorokoro nyuma ya nyumba yako?  Kwa sababu tu huuoni mrundikano huu kila siku, haimaanishi hauko pale! Vitu vinavyokuzunguka vinakusemea ulivyo iwe vinaonekana au havionekani. Kuepuka kuelemewa wakati ukiwa unajaribu kuondoa mrundikano ni vyema kufanya zoezi hilo hatua kwa hatua. Hatua ya kwanza ni kuigawa kazi kwenye mafungu madogo dogo. Chagua kabati moja au shelfu kama hatua yako ya kuanzia. Jipongeze pale unapomaliza. Halafu nenda eneo linalofuata.Unaweza ukawa na muda maalum wa kushughulikia eneo moja kwa siku. Jambo la muhimu ni kuwa weka mikakati ya kazi ambayo itawezekana. Kama ukisubiri muda wa kutosha kufanya kazi yote pamoja, hautakaa upatikane – na hicho ni kisingizio cha kutokuanza kabisa.

Wakati ukianza kazi yoyote ya kuondoa mrundikano, panga kuchambua vitu hapo hapo ulipo. Kusanya (au weka kwenye maboksi) vitu vya kundi moja; kwa mfano, vitu vya kutupa, vitu vya kupeleka stoo, vitu vya kugawa, vitu vya kuuza, vya kuweka masijala na kadhalika. Ukishakuwa umechambua, sasa ni wakati wa kupeleka kila kimoja kunakohusika (vya kuuza unaweza kuhifadhi stoo kwa muda!). Sasa tafuta makao ya vile unavyohitaji. Huenda ni wakati wa kununua mifuko au vikontena kwa ajili ya vitu hivyo. Ndiyo njia pekee kwamba ni vyema kununua vikontena baada ya kujua ni nini unataka kuweka ndani. Baadhi ya watu wanafanya makosa kwa kununua kontena kabla ya kuchambua vitu na  hii inafanya visiwe na ukubwa sahihi au pia navyo kuwa mrundikano vilevile.

Je, unakuwa na wakati mgumu wa kuachilia vitu? Unahifadhi vitu kwa labda “lolote litatokea”? Je, unahifadhi zawadi ambazo hujawahi kutumia kwa sababu hutaki kuwavunja moyo waliokupa? Je, unajisikia vibaya usipozungukwa na vitu vingi? Je, unahifadhi nguo ambazo hazikutoshi kwa miaka 10 kwa wazo kwamba utazivaa tena baada ya kupungua kilo 7? Je, umehifadhi vitabu vya hadithi ambazo huzikusisimui tena? Utakapojibu maswali haya kwa uaminifu utaanza kufahamu ni wapi mrundikano ndani ya makazi yako unapotokea.

Kuachilia vitu ambavyo hatuvitumii tena, hatuvihitaji wala hatuvipendi ni hatua muhimu ya kuondoa mrundikano na kuanza kusafisha. Inaweza kuwa ngumu sana kwa baadhi. Kama unahitaji msaada kwenye huo mchakato, shika kifaa ambacho kwa namna yoyote ile hakikusaidii tena, kiambie asante kwa namna ambayo wakati fulani kilikusaidia kwenye maisha yako, na baada ya hapo kiachilie. Kumbuka kua kuachilia vya zamani kunaleta nafasi ya vipya. Inaonyesha imani ya yatarajiwayo.
Kuna wengi wanaoweza kufaidika na usivyohitaji. Je ni vyema kushikilia kitu ambacho hutakaa ukitumie lakini unakiweka kwa kuwa nyanya yako alikupa miaka 15 iliyopita ,au ni busara kumpa mtu ambaye atakitumia na kukithamini? Kwa kuachilia vitu kwenda kunakohitajika, unaondoa mrundikano na unajisikia vizuri kwenye jambo hilo.

Kipupwe ni msimu mzuri wa kuondoa mrundikano. Kwa jinsi unavyyoondoa mrundikano kwenye mazingira yako ndivyo unavyotengeneza nguvu chanya kukuzunguka. Badilisha maisha yako kwa kuondoa mrundikano!

Makala hii imeandaliwa na Vivi Machange ambaye ana mapenzi makubwa juu ya muonekano wa makazi na pia ni mjasiriamali wa usafi wa magari, mazulia na nguo. Kwa maoni au maswali tuma kwenda 0755 200023 au christines.daughter@yahoo.com

living heaven on earth..

kuna baadhi ya binadamu wenzetu kweli wanaishi....hebu cheki nyumba hii mpya ya actor Mark Wahlberg......ina ukubwa wa square foot elfu 30. Mark haishi peke yake ana mke na watoto wanne, kwahivyo kwa mahesabu ya haraka haraka kila mwana Wahlberg anamiliki square foot elfu tano...hapo bado uwanja eneo la nje ya nyumba.....je mdau, wewe pia ungependa kuwa tajiri ??

hawa wadudu hawa...watu na tamaduni zao na mapenzi yao kwakweli..

yani nisivyopenda kumfuga huyu mdudu hata nje sembuse kumweka ndani ya nyumba..jamani..haya maisha kweli kipenda roho.. poop yake kama ya binadamu..si unajua misosi yake ni kama ya mtu... ni ile ile. bottom line ni kuwa anayetaka kumfuga na awe tayari kufagia poop.
ukute imechanganyika na minyoo sasa...waweza taapika yani.

halafu sasa, wakianza kubweka usiku kucha wakiungana na wa huko nje ya fensi hata hakulaliki...hapo ni kabla hawajaleta viroboto...lahaula! niwe tu na ulinzi wa aina nyingine lakini sio huyu mdudu.

 ndani ya dabodeka mdudu katulia na kitabu chake pembeni

 madai eti anajenga bond na mwenye nyumba

mdudu anatumia mto kiubwete kabisa

--nitavukaje--kutoka muajiriwa kwenye NGO hadi ufugaji

Bw. Peter ana masters ya kilimo toka SUA, nimechat naye mawili matatu kuhusu kuvuka kwake toka kuwa mwajiriwa hadi kujiajiri. Ananiambia alikuwa ameajiriwa kwenye NGO lakini alifika mahali akajiuliza kuwa kwa nini asitumie elimu yake kujiajiri. Na hii ilitokana zaidi na rusha roho ya wafadhali ku withdraw na hivyo kutokuwa na uhakika wa ajira. Ameamua kutumia elimu yake ya kilimo kwa kufuga kuku, kwale, bata mzinga na bikini kwenye sehemu ya shamba lake la heka 2 alilonunua mpiji magohe ambapo ameligawa viwanja vinne. Kimoja ameweka makazi yake, cha pili ameweka nyumba za wapangaji, cha tatu ameweka mifugo yake (ambapo anasema kutokana na uzio anafuga free range system) na cha nne ameweka ofisi yake. Nikamuuliza kwale ni nini, akaniambia ni ndege wadogo ambao mayai yake yanatafutwa na wazazi wengi kwa ajili ya kuwapa watoto wao kuongeza grey matter ya kwenye brain, mayai hayo pia ni dawa na huwa yanaongeza hata kiwango cha CD4 kwa waathirika wa Ukimwi. Anasema yai moja la kwale ni sh 600. Anajivunia kujiajiri kwenye kilimo kwani anasema amekuwa na uhakika na kipato kwa mfano bata mzinga mmoja anamuuza hadi sh 100,000 wakati bikini ni sh 250,000.

Umehamasika na stori hii? Kaa standy kwa itakayofuata kukuwezesha  kukuvukisha au pengine kukupa wazo la biashara...

--vitu vizuri-- i cant believe it's October already!

October ndio hiyo na upepeo wake mkali, nimemtembelea rafiki yangu makongo nikakuta kaotesha apples na embe fupi kwenye nyumba yake mpya. Miche hiyo ya ameichukua SUA na ananiambia kwa mi apple inachukua miaka minne hadi mitano ndio uone tunda lake. 

Ninadhani ni vyema zaidi huyu kuotesha miche hii badala ya mti ni mti tuu kwani anafaidi vyote, muonekano wa apple nyekundu ambao ni kama maua, kivuli na tunda lenyewe..na nadhani hata ukiwa unafaidi kivuli likakudondokea kichwani halikuumizi bali ni kudaka na kuosha na kula. Heee he..nisisahau kukujuza kuwa kwenye kula apple usimenye matunda yake kwani utakosa zile fibers.

lazima umeze mate...