Zijue aina tofauti za marumaru za jikoni na matumizi yake

Kwa wenye nyumba wengi na hata wale wanaotarajia kumiliki nyumba zao wenyewe,  marumaru bado zinabaki kuwa chaguo namba moja kutokana na mtindo wake ambao ni rahisi kwa matumizi, bei nafuu na hata upatikanaji katika rangi na maua mbalimbali. Iwe unaweka marumaru jikoni ukuta mzima hadi kufikia dari au hadi mahali fulani hapo kati, kutumia moja wapo kati ya aina za marumaru kutalipa jiko lako muonekano wa kuvutia.

Jiko lina sehemu nyingi ambazo marumaru zinaweza kuwekwa.

Itapendeza kama utatumia marumaru ambazo ni sahihi kwa kila eneo. Unaweza kutumia marumaru sakafuni, ukutani na vilevile kwenye kaunta.

Moja kati ya vitu muhimu kukumbuka  kuhusu marumaru za jikoni ni kuweka zile ambazo hazipitishi maji. 

Marumaru/vigae visivyokuwa na ukanda wa kioo na pia mbao zikiwekwa jikoni katika maeneo yanayogusa maji zinaweza kuharibika haraka kwa namna mbalimbali kama vile kuwa na madoa. Nimeshirikiana na

muuzaji wa duka la marumaru jijini Dar salaam bwana Huruma Ally kukujuza aina  tofauti zifuatazo za marumaru zilizopo sokoni ambazo zinazofaa kwa jikoni:

Marumaru za Seramiki

Marumaru za seramiki ni maarufu sana na zimesambaa maeneo mengi. Ni nzuri kimuonekano na kwa matumizi pia. Hii ndio sababu wenye nyumba wengi wanachagua kuzitumia ndani ya jiko. Marumaru hizi zinahimili joto, ni imara na zinapatikana kwa mitindo na rangi mbalimbali. Marumaru za seramiki zinaweza kutumiwa kwenye sakafu, ukutani na kaunta.

Marumaru za Poselini

Ingawa marumaru za seramiki na poselini zote zimetengenezwa kwa udongo uliochanganywa na malighafi nyingine, hizi za poselini ni ngumu na imara zaidi kuliko za seramiki. Na wakati zile za seramiki zinaweza kubadilika rangi baada ya kukanyagwa sana, hizi za poselini unene wote wa marumaru ni rangi moja kwa maana ya kwamba hazibadiliki na wala hazionyeshi alama za kukwaruzika. Marumaru hizi zinapatikana kwa rangi za mfumo usiong’aa  wa mati na wa kung’aa wa polishi. Gharama ya marumaru za poselini huwa ni kubwa kwa mara 2 zaidi ya zile za seramiki. Sawa na seramiki, marumaru za poselini unaweza kuzisimika popote jikoni.

Marumaru za kioo

Hizi nazo ni madhubuti na imara kama za poselini. Zinatabia ya kuonekana mithili ya kioo na hata ukiwa unazitizama unajiona picha yako kama kivuli. Zinafaa yale maeneo ya kuweka madoido kama vile eneo la kupakulia chakula.

Marumaru za jiwe

Marumaru za jiwe ni sahihi kwa muonekano wa kifahari. Ni za gharama japo za bei nafuu zipo pia. Kama unataka marumaru za jiwe kwa bei rahisi changua granite ila la gharama chagua marble. Mwenye nyumba asiyetaka jiwe lakini anataka muonekano wa kifahati eneo fulani la jiko basi weka marumaru ndogondogo za mosaic zile tunazoshuhudia zaidi kwenye kupamba nguzo.

Marumaru za plastiki

Hizi ni marumaru zinazotokana na plastiki nene na ngumu, ni rahisi kusimika na ni bei rahisi sana. Zinafaa kwa kuta za jiko lakini ni rahisi kukwaruzika na zinahitaji utunzaji wa karibu.

Kwenye kuchagua hizi marumaru za jikoni ni vyema pia ujue unataka kuziweka kwenye muundo upi. Kuweka kwa msharazi kunavutia eneo likiwa kubwa ila ukae ukijua kwamba marumaru zinazofaa kwa uwekaji huu ni zile ambazo pande zote nne zinalingana. Na pia uwekaji wa mshazari unachukua vipande vingi zaidi kwa asilima 10 ya uwekaji wa kawaida. Inahitajika kazi kubwa zaidi hasa kukatakata kwa hivyo na gharama ya mwekaji  wa mtindo wa mshazari unaweza kuongezeka.

Je msomaji wangu kuna mahali panakutatiza kuhusu muonekano wa nyumba na bustani? Tuwasiliane 0755 200023 na pia tembelea mshirikishe na mwenzio blog hii ili anufaike kama wewe. www.vivimachange.blogspot.com