GWAJIMA AMGOMEA MAKONDA, ASEMA HATOKWENDA KWA MAHOJIANO OFSINI KWA MKUU HUYO WA WILAYA

MKUU wa Wilaya ya Kinondoni, Paul Makonda amemwandikia barua Askofu wa Kanisa la Ufufuo na Uzima, Josephat Gwajima akimtaka afike mbele ya Kamati ya Ulinzi na Usalama ya Wilaya kwa mahojiano. 

Inaelezwa kuwa Makonda alimtumia Askofu Gwajima barua hiyo Machi 30 mwaka huu, akiwa amelazwa katika Hospitali ya TMJ. Hata hivyo, kiongozi huyo wa kiroho amegoma akisema hawezi kwenda ofisini kwa mkuu huyo wa wilaya kwa mahojiano.

Mmoja wa wasaidizi wa Askofu Gwajima aliliambia MTANZANIA jana kuwa hatua ya Makonda kumtumia barua haikumpendeza kiongozi huyo wa kanisa.

“Makonda alikuja katika Hospitali ya TMJ na kudai amekuja kumwona Askofu Gwajima huku akiwa amebeba barua yake. Baada ya kumwuliza hali ya maendeleo ya afya yake alitoa barua na kumkabidhi jambo ambalo halikuwa jema. “Baada ya muda Askofu Gwajima alituita wasaidizi wake na kutueleza kuwa amepewa barua ya wito kwa DC, sasa tukajiuliza askofu anaumwa. Je, inakuaje aende tena katika mahojiano na mkuu wa wilaya? “Na kama ni hivyo nini kazi ya polisi maana wamemuhoji tangu siku ya kwanza baada ya kumkamata. Je, inakuaje tena Makonda alete barua ya kumtaka askofu akahojiwe tena mbele ya Kamati ya Ulinzi na Usalama ya Wilaya mbele ya DC?

 “Hapa kuna mchezo unataka kufanywa na je, katika masuala haya ya usalama sijui kama huyo DC anajua wajibu wake. Mtu anahojiwa na polisi sasa inakuaje tena aitwe na DC ahojiwe na kamati ya ulinzi? 

Amesema hatokwenda,” alisema msaidizi huyo wa Gwajima ambaye hakutaka jina lake litajwe gazetini. MTANZANIA ilimtafuta Mkuu wa Wilaya ya Kinondoni Paul Makonda kupata ufafanuzi wa barua yake hiyo, ambapo alijibu kwa kifupi kuwa ni kweli amemwandikia barua ya wito kiongozi huyo. 

Alipoulizwa ni hatua zipi Askofu Gwajima atachukuliwa kwa kutaa kutii wito huo, Makonda alisema. “Kuhusu hatua subirini mtaziona wenyewe” alisema mkuu huyo wa wilaya. Gwajima kuripoti polisi wakati huohuo, Askofu Gwajima leo anatarajiwa kuripoti katika Kituo Kikuu cha Polisi Kanda Maalumu ya Dar es Salaam kuendelea kuhojiwa kuhusiana na tuhuma zinazomkabili. 

Gwajima aliachiwa kwa dhamana juzi baada ya kutoka katika Hospitali ya TMJ ambako alikuwa amelazwa kwa matibabu baada ya kuanguka ghafla wakati akihojiwa na polisi. 

Akizungumza na MTANZANIA jana, Mwanasheria wa Gwajima, John Mallya alisema baada ya kuruhusiwa juzi, leo anatakiwa kuripoti tena katika kituo hicho kuendelea na mahojiano. “Polisi walituambia twende kesho (leo) kwa mahojiano kwa sababu yalikuwa hayajakamilika… lakini tunaamini polisi wanaweza kumruhusu kurudi nyumbani kupumzika au kuendelea na mahojiano mengine,”alisema Mallya.

Alisema mpaka sasa anaendelea vizuri na matibabu na afya yake inaendelea kuimarika siku hadi siku tofauti na alivyokuwa awali. Gwajima alifikishwa polisi kwa madai ya kumtukana na kumkashifu Askofu Mkuu wa Kanisa Katoliki Jimbo la Dar es Salaam, Mwadhama Polycarp Kardinali Pengo. Wakati anahojiwa alianguka na kuzimia hali iliyosababisha akimbizwe katika hospitali ya polisi Kurasini kabla ya kuhamishiwa katika Hospitali ya Taifa Muhimbili (MNH) na baadaye Hospitali ya TMJ kwa matibabu zaidi. 

Juzi Askofu Gwajima alikwenda polisi akiwa amepandishwa kwenye baiskeli maalumu ya wagonjwa. Akiwa anainuliwa kwenye kiti na kupandishwa katika gari, Askofu Gwajima alionekana akikunja uso na kufungua mdomo kama mtu anayegugumia kutokana na maumivu makali.

Baada ya kutoka hospitalini msafara huo ulielekea moja kwa moja hadi Kituo cha Polisi cha Oysterbay na baadaye kuachiwa kwa dhamana