Kundi Lililojipanga Kumzomea Waziri Membe Kwenye Tamasha la Pasaka Laonywa....Ni Mashabaki wa Mwanasiasa Mmoja Walionunua Tiketi za Sh. Milion 5

Mkurugenzi wa Msama Promotion, Alex Msama ametoa onyo kwa kikundi cha watu kilichojipanga kumzomea Waziri wa Mambo ya Nje na Ushirikiano wa Kimataifa, Bernard Membe atakayekuwa mgeni rasmi wa Tamasha la Pasaka

linalotarajiwa kufanyika hii leo katika Uwanja wa Taifa jijini Dar es Salaam.

Akizungumza na Mwananchi jana, Msama alisema kuwa amepata taarifa kuhusu uwapo wa mashabiki wa mwanasiasa mmoja, ambao wamenunua tiketi nyingi kwa lengo la kuzomea.

Msama aliyasema hayo baada ya kuulizwa iwapo alikuwa na taarifa kuhusu kikundi hicho ambacho kwa mujibu wa habari zilizolifikia gazeti hili kina lengo la kuingiza watu 1,000 ambacho kimenunua tiketi za Sh5 milioni.

“Hilo suala ninalijua na nimepewa taarifa na baada ya kuchunguza nikagundua ni kweli, kikundi cha watu kilifika katika kituo cha kuuzia tiketi cha Mwenge na kuchukua tiketi nyingi na baadaye walikwenda katika vituo vingine kikiwapo cha Millennium Tower na kununua nyingine,” alisema Msama na kuongeza:

“Mimi kama mwandaaji nimeamua kuwataarifu maaskofu mbalimbali ambao ni walezi wangu ili walifahamu hili, pia Katibu wa Umoja wa Maaskofu ana taarifa hizi, lengo lao tumeshalijua.” Msama ambaye pia ni Mwenyekiti wa kamati ya tamasha hilo, alisema, “Tumemwalika Membe kwa sababu hatukutaka kualika mtu ili atupatie fedha au kununuliwa, bali kamati yenye wachungaji na maaskofu ndiyo iliyoamua yeye awe mgeni rasmi.”

Alisema ifikie hatua dini isitumike kama mwamvuli wa kisiasa.

“Mimi nasema huyo mwanasiasa hagombani na Msama au Membe bali anagombana na Mungu. Mimi namwachia Mungu haya yote na lazima ajue kwamba mambo ya kisiasa hayalandani na dini, asiyaingize huku, hili ni tamasha la kumwabudu Mungu na siyo vinginevyo,” alisema Msama.

Katibu Mkuu wa Umoja wa Makanisa ya Kipentekoste nchini (CPCT), Askofu David Mwasota alisema mkutano wa Pasaka unaeleweka dunia nzima, ni siku ya kusherehekea ukombozi hivyo watu wasiutumie tofauti.

“Wote ambao tumewaalika wapo serikalini yaani ni wafanyakazi wa nchi hii na siyo vinginevyo. Wana hadhi na vigezo kwa kuwa wameshika nyadhifa kubwa na hilo ndilo tuliloliangalia.

Hatukuangalia vyama na tunachosubiri ni wao kukaa na kutuletea wagombea, ninachokiona hapa wagombea wataumizana bure, bado hakuna chama kilichotangaza mgombea, fitina za nini?” alihoji Askofu Mwasota.