WAKILI MAARUFU ARUSHA MBARONI KWA UTAPELI

WAKILI mwandamizi wa kujitegemea wa jijini hapa, Manase Keenja (53) mkazi wa Kijenge Mwanama, Arusha, anashikiliwa na jeshi la polisi kwa tuhuma za kughushi nyaraka za serikali na kujipatia fedha kwa njia ya udanganyifu zaidi ya Sh milioni 320.

Keenja anayemiliki kampuni ya uwakili ya Keenja Advocates iliyopo mtaa wa Azimio jijini Arusha alitiwa mbaroni Mei Mosi mwaka huu majira ya saa 6 mchana kwa tuhuma hizo za kughushi.

Wakili huyo mkongwe mbali ya kujipatia fedha kwa njia hiyo, pia amekamatwa na mihuri mbalimbali ya serikali, ikiwemo ya Mahakama Kuu Kanda ya Arusha, Kamishna wa Ardhi Kanda ya Kaskazini, mhuri wa ofisi ya Ardhi Halmashauri ya Jiji la Arusha na mihuri ya Mahakama zote za Mkoa, Wilaya na mwanzo za Mkoa wa Arusha.

Kaimu Kamanda wa Polisi Mkoa wa Arusha, Edward Balele alipoulizwa juu ya kukamatwa kwa wakili huyo na mwandishi wa gazeti hili alikiri na kusema kuwa polisi bado inamshikilia kutokana na upelelezi kutokamilika na upelelezi ukikamilika atafikishwa katika vyombo vya sheria.

Balele alisema polisi haiwezi kumwachia kwa sasa mpaka upelelezi utakapokamilika, kwani kuachiwa haraka kunaweza kuharibu upelelezi wa kesi hiyo.

Alisema kukamatwa kwa wakili Keenja kumetokana na malalamiko ya wafanyabiashara watatu tofauti wa Jiji la Arusha walioripoti kituo kikuu cha polisi Arusha juu ya ‘kutapeliwa’ mamilioni ya shilingi na wakili huyo.

Kamanda huyo alisema miongoni mwa wafanyabiashara wanaodaiwa kudhulumiwa na wakili huyo ni pamoja na Macklin Temu anayemiliki kampuni ya maduka ya vipuri vya magari ya Denso, ambaye inaelezwa amepoteza Sh milioni 120 mbele ya wakili huyo.

Inadaiwa alichukuliwa fedha hizo Aprili 23 mwaka 2013 kwa kuuziwa kiwanja namba 12 kilichopo katikati ya Jiji la Arusha ambacho kinamilikiwa na mtanzania mwenye asili ya kiasia Ragieder Kumar, ambaye kwa sasa ni marehemu kwa kiasi hicho cha fedha.

Kamanda alisema Temu aligundua kutapeliwa Septemba 30 mwaka jana, kuwa hatimiliki ya kiwanja hicho ni ya kughushi na kuripoti kituo cha polisi Arusha Machi 4 mwaka huu, majira ya saa 7 mchana.

Alisema wakili huyo anatuhumiwa kufanya biashara ya kitapeli kwa hati hizo hizo za kughushi kwa mfanyabiashara mwingine Valetine Tarimo (43), mkazi wa Kwa Ngulelo ambaye aliuziwa kiwanja hicho hicho kwa bei nafuu ya Sh milioni 20.

Kamanda Balele alisema siku chache baada ya Tarimo kutoa taarifa hiyo, mfanyabiashara mwingine, Jubileth Garson alifika katika kituo hicho Aprili 25 mwaka huu na kutoa taarifa ya kutapeliwa Sh milioni 182 kwa hati ile ile feki ya kiwanja namba 12.

HABARI LEO