Matapeli Waingilia Mtandao wa Kafulila

Siku moja baada ya Bunge kupitisha muswada wa Sheria ya Makosa ya Mtandao ya mwaka 2015, kasi ya matumizi mabaya ya mitandao ikihusisha majina ya wabunge imeendelea.

Jumatano wiki hii, Bunge lilipitisha muswada huo

wenye vifungu 59 vya sheria baada ya kukaa zaidi ya saa saba ili kupitia kifungu hadi kifungu.

Licha ya Muswada huo wa sheria kupitishwa, baadhi ya watu wameendelea kutumia mitandao ya kijamii kinyume cha sheria kwa kufungua akaunti/ kuingilia zile zilizofunguliwa na viongozi na kutuma jumbe za kuwalaghai au kuwahadaa wananchi bila kujali kuwa kitendo hicho ni kinyume cha sheria.

Gazeti la NIPASHE lilibaini akaunti ya David Kafulila aliyoifungua mtandao wa Facebook, ikiwa imeandikwa: 'Habari za asubuhi ndugu wananchi, natumai wengi wetu tumeiona siku ya leo ya Alhamisi na nina imani kila mmoja wenu ameamka na afya njema....Ndugu wananchi naomba tuchangie mawazo kwa moyo mmoja kupitia mada hii na iwapo nitapendezwa na wazo la Mtanzania yeyote bila kujali itikadi yoyote naahidi kumuwezesha.

Mada ni hii: KWA MTAJI WA TSHS MIL.15 NI SHUGHULI GANI UNAWEZA KUIFANYA IKAKUWEZESHA KUKUIMARISHA UCHUMI WAKO BILA KUPATA HASARA ITAYOPELEKEA KUMALIZA HADI MTAJI HUU WA TSHS MIL.15.

Naomba tuchangie mawazo kwa pamoja ndugu wananchi huwezi jua iwapo wazo lako litakuwa zuri litakupa nafasi nikakuwezesha kupitia wazo lako hilo.

HIZI NDIO FURSA ZENYE /SHARE NA MTANZANIA MWENZAKO AJE KUCHANGIA" mwisho wa kunukuu.

Baada ya mwandishi wa habari hizi kusoma ukurasa huo, aliwasiliana na mbunge huyo, ambaye alikanusha kuandika kwenye ukurasa huo.

Kafulila alisema maelezo hayo siyo yake na kueleza kuwa watu hao ni matapeli ambao wamekuwa wakiingilia mitandao ya viongozi kurubuni/kuwadanganya wananchi.

Akitoa maoni yake kuhusiana na vitendo hivyo, alisema lazima kuwapo kwa mfumo utakaosaidia namna ya kumpata mtu anayetumia jina la mwingine au jina feki kufanya utapeli.

"Uhuni huu wa kuingilia akaunti yangu ya Facebook umenisumbua kwa muda mrefu na kunikosesha amani mimi binafsi na wadau wa mtandao ambao nimekuwa nikiwasiliana nao kwa njia ya mtandao," alisema.

Wabunge wengine ambao wamekumbwa na karaha hiyo ni pamoja na aliyekuwa mbunge wa Kigoma Kaskazini, Zitto Kabwe ambaye jina lake lilitumika kwenye mtandao huo kuwarubuni Watanzania.

Mbunge mwingine ambaye jina lake liliwahi kutumika vibaya kwenye mtandao huo ni la Halima Mdee (mbunge wa Kawe), ambaye mara ya mwisho, ukurasa wenye jina lake kuliandikwa kuwa  Mdee ameanzisha Chama cha Kuweka na Kukopa (Saccoss) wakati sio kweli.