Serikali Kuzichukulia Hatua Shule Zilizofungwa kwa Madai ya Njaa.....Kumbe Pesa Zilishapelekwa Akaunti za Halmashauri..

Katibu mkuu wa Wizara ya Tamisemi Jumanne Sagini.

Serikali imeagiza Wakurugenzi wa halmshauri manispaa na majiji kuwachukulia hatua walimu wakuu waliotangaza kufungwa kwa shule kutokana na ukosefu wa chakula kwa kuwa hawakufuata taratibu.

Akizungumza jana jijini Dar es Salaama Katibu mkuu wa wizara ya TAMISEMI Jumanne Sagini amesema kuwa walimu hao hawakustahili kutangaza kufungwa shule wangewasiliana na wakurugenzi ambao ndio wenye mamlaka huku akisisitiza kuwa pesa tayari zilishapelekwa katika akaunti za Halmashauri.

Akizungumzia kuhusu malipo ya wazabuni ambao wanadaiwa kugomea kusambaza chakula kutokana na kutolipwa pesa zao amesema kuwa tangu Julai Mwaka jana hadi Machi mwaka huu serikali imelipa zaidi sh bilioni 28.1 sawa na asilimia 66.7 ya madeni ya wazabuni.

Sagini amesema ameshangazwa na kusikia kuwa shule zimefungwa kutokana na kukosa chakula wakati fedha zimeshapelekwa kwenye halmashauri zao na kushangazwa na kusikia kuwa wazabuni hao hawajalipwa.

EATV